Internet aqqutigalugu qinngasaarisarnernut nittartagaq akiuiniartoq

Kalaallit Nunaanni Meeqqat Ikiortigit inuit attaveqaqatigiittarfiini qinngasaarisarneq akiorniarlugu paasissutissiinermik saqqummersitsivoq.

- MIO-mit misissorneqarsimasut naapertorlugit, meeqqat inuussuttullu internetikkut qinngasaarisarnerat allatullu nuanniitsuliortarnerat misigineqartarput, taamatullu iliortut ilaasa oqaatsit periutsillu atorsimasatik peqqissimissutigisarpaat, nunatsinni Meeqqat Ikiortigimi siulersuisuini siulittaasoq, Jonna Ketwa, tusagassiuutinut nalunaarummi oqaluttuarpoq.

Taamaattumik nunatsinni Meeqqat Ikiortigit Kalaallit Nunanni Pinerlutsaaliuinermut Siunnersuisarfik PiSiu peqatigalugu meeqqanut, inuusuttunut, angajoqqaanut, ilinniartitsisunullu nittartagaliorsimavoq, siunnerfigalugu internetikkut attaveqartarnerup toqqissisisimanarnerusumik isumananannerusumillu atorneqarsinnaanissaa.

Siunnersuutitsialaaat

Chat Paaralugumi meeqqat inuusuttullu siunnersorneqarput qanoq iliorlutik internetimik atuinerminni toqqissisimanartumik atuisinnaasut. Aamma ilitsersuunneqarput qanoq iliorsinnaasut arlaatigut internetikkut qinngasaarneqarunik imal. kissaatinngisaminnik assitik allatulluunniit takutikkusunngisaminnik siammartiterisoqarsimappat.

Kiisalu angajoqqaanut atugassanik atuagassaqarpoq, taakku meeqqami internetimikt atuinerannut atatillugu paasinninnerulersinnaanissaat angujumallugu, soorlu tassani ilisaritinneqarlutik nssuiarneqarlutillu quppernerit nittartakkallu nalinginnaanerpaasumik inuussuttunit atorneqartartut.

- Anguniarneqartoq tassaavoq angajoqqaat meeqqami pitsaanerpaamik internetimik atuininissaannik tapersersuillutillu ikiuisinnaanissaat, uparuartuinertaqanngitsumik, meeqqalli silarsuaannik paasinninerulernikkut, Jonna Ketwa oqaluttuarpoq.

Aamma ilaapput ilinniusiat ilinniartitsisunut allatullu meeqqanik sullissisisartuusunut atugassiaasut. Taakkunani assersuusiat atorlugit iliniartitsissutigineqarput, internetikkut ajornartorsiutit atuartullu akornannni aporaassutaasinnaasut qanoq iliorluni aaqqinniarneqarsinnaasut.

Chat Paaralugu Meeqqat Ikiortigip nutaamik nittartagaliorneranut atatillugu atajuartussatut saqqummiunneqarpoq. Taamaattumillu Chat Paaralugu redbarnet.gl iserfigalugu qaqukullulluunniit takuneqarsinnaassaaq.