Inorlutik inuusunut anaanaq: Tapersersortissaaleqisarpugut

Thora Steenholdtimut ulloq januaarip 25-at 2018 inuunermut allannguuterujussuuvoq. Ulloq taanna sapaatit akunnerinik qulinik siusinaarlutik inunngortunik marlulivoq.

Thora Steenholdt paninilu Mona.

Thora Steenholdt marlulissanik naartunermini, naartunerup ingerlanerani toqunartoqalersimasoq paasineqarpoq. Sukkasuumik ajorsiartorpoq, taamaammat Aasianni napparsimmaveqarfimmi siullermik unitsinneqarpoq, kingornalu Nuummut ernisarfimmut piaartumik aallarunneqarluni. Nuummi nakorsat aalajangerput marlulissat siusinaartumik pilattaanikkut inunngortinniarlugit, marlulissallu januaarip 25-ani 2018-imi, sapaatit akunneri qulinik siusinaarlutik inunngorput.

- Angajulleq inunngorami 1.000 gramiinnarnik oqimaassuseqarpoq, 36 cm-isullu takitigaluni. Nukarleq anginerulaarpoq. Nakorsat oqarneratut peqqittunnguupput, Thora Steenholdt, 28-nik ukiulik oqaluttuarpoq.

- marlulissat niviarsiaqqat.

Thora Steenholdt pingasunik allanik meeraqarpoq, qatanngutitaarnerminni qulinik, arfinilinnik ataatsimillu ukiulinnik. Taakku aanaakkuminni Kangaatsiami paarineqarput, Thora uinilu Nuummiikkallarneranni.

Peqqissutsimikkut ajornartorsiuteqalersut

Tusarnaartussamik nassaarsinnaaneq Thoramut ajornarsimavoq. Meerai angajullerit pingasut piffissaq eqqorlugu inunngorsimapput, siusinaartumillu inunngortut allatorluinnaq pisariaqartitsimmata sungiussiniarnissaq ajornaatsuinnaanngilaq.

Inunngornerisa aqaguani niviarsiarannguaq nukarleq toquvoq.

Niviarsiaqqap uummamminik ajoquteqarnera nakorsat arajutsisimavaat.

Niviarsiaqqap uummataa tunniutiinnarpoq.

- Anaanatut meerannguamik annaasaqarneq assorsuaq oqimaappoq. Paasitinneqarpugut meeqqat peqqissunnguusut, nukarlerli aqaguani toquvoq. Naluarpulluunniit ikioqqulluta sumut saaffiginnissalluta, Thora Steenholdt oqarasuaatikkut nipikilliartorluni oqaluttuarpoq.

Nukarliup toqunerata malitsigisaanik Thora uinilu Nuummi ilisinissamik aaqqissuussisariaqarput. Thorami inoorlaannguarlu annattoq 3.000 graminik oqimaassuseqalernissaata tungaanut Nuummiittariaqarmata, ilisinissaq utaqqissunneqarsinnaasimanngilaq.

Saaffissaaleqineq

Thora Steenholdt Nuummi katillugit qaammatit sisamat uninngavimmiippoq. Peqqissiartupallakkaluarluni uninngatitaanermini aneqqusaasimanngilaq, naartunermini toqunartoqalersimanini peqqutigalugu.

- Angajoqqaanut inortunik inunngortunik meeralinnut neqeroorutit amerlanerusariaqaraluarput. Meeqqagut pillugit tapersersorneqarnissaq ikiorneqarnissarlu anguniarlugit saaffissaqartanngilagut, Thora Steenholdt Sermitsiaq.AG-mut oqaluttuarpoq.

Kangaatsiamut angerlareernermini nakorsamik oqaloqatissaminik ujartuigaangami peqqissaasumit nalilersorneqaqqaartariaqarneq arlaleriarluni misigisarsimavaa.

- Tarnip pissusaanik ilisimasalimmik oqaloqatissatsinnik peqartariaqaraluarpugut. Angajoqqaat inorlutik inunngortunik meerallit ukkatarineqanngippallaaqaagut, Thora Steenholdt naggasiivoq.

Powered by Labrador CMS