Birna
Inoqammik pingaartitseriasaarneq
Birna Brjánsdóttirp toqunerata kingorna inuppassuit misiginneqataanerminnik takutitsinissaminnik pisariaqartitsisutut misigipput
Akunnerit arlaqanngitsut ingerlanerini pivoq.
Aviâja E. Lynge Facebookimi allappoq, kinguninngualu eqqarsaat Nuummiinnaanngitsoq, Nunarpulli tamakkerlugu siammartipallappoq.
Birnamut naneruummik ikitsisoqarpoq.
Misiginneqataanermik takutitsinissamik pisariaqartitsineq
Birna Brjánsdóttir sissami Reykjavikip kujataani toqungasoq ullumi nassaarineqarpoq. Toqutaasimanissaa politiit ilimagaat.
- Iliuuseqarpallaarsinnaanngilagut, kisianni misiginneqataanerput takutissinnaavarput, Aviâja E. Lynge oqarpoq.
Amerlasoorpassuillu taannatut misigisimannguatsiarput.
Nuummiinnaq inuit 400-t missaanniittut Islandip aallartitaqarfiata naaneruuseriartorlutik saavanukarput.
Nuna tamarmi ilannguttoq
Illoqarfiit arlallit aaqqissuussamut ilanngupput, arnarlu 20-nik ukiulik Aasianni, Maniitsumi, Paamiuni, Qaqortumi, Nanortalimmi aamma Uummannami eqqaaniarneqarpoq.
'Ilagut eqqaamasigit'
Ilaatigut aamma Qaqortumit tallimanngornermi siuliani Tasiilami arnamut toqunneqartumut, tamanullu asasamik annaasaqartunut naneruummik ikitsisoqarpoq.
- Tasiilami arnamut toqunneqartumut aamma asasaminnik annaasaqartunut tamanut naneruummik ikitsinngilagut. Taakku pillugit uanga aamma nalunaaqutaq 19:00 naneruummik ikitsiniarpunga, Edda Lyberth, Qaqortumi aaqqissuusisoq Facebookimi allappoq.
Maani aamma ilaqutaasut eqqaamaneqarnissaat pingaaruteqartoq, Aviâja E. Lynge aamma isumaqarpoq.
- Nammineq nunatsinni annaasaqartunut misiginneqataanerput takutinniarlugu una immaqa atorsinnaavarput, taanna oqarpoq.