siunnersuut
Innuttaasut taasitinneqartarnissaat akerlerineqaqisoq
Innuttaasut ajornannginnerusumik taasitinneqartarnissaannik IA-p siunnersuutaa ilalerneqanngilaq.
Inatsisartut politikkikkut aalajangiinissanut oqalliffiuvoq eqqortoq. Partiit amerlanerussuteqarluartut taama isumaqarput.
Inuit Ataqatigiit kissaatigaat Inatsisartuni ikinnerussuteqartut siunnersuummik innuttaasunut taasisitsisinnaalissasut. Tassa eqqorluartumik Inatsisartunut ilaasortat 1/3-iisa tamanna isumaqatigippassuk, tamannalu inatsisini tunngaviusuni aalajangersakkanut naapertuuppoq, tassuuna folketingimut ilaasortat 1/3-iisa piumasarisinnaallugu innuttaasunik taasisitsisoqarnissaq. Savalimmiuni inatsit taamaattoq atuuppoq.
Urani
Peter Olsenip (IA) isertuutinngilaa uranimut akuersaanngilluinnarnermik oqallinneq siunnersuummut tunngaviusimasoq.
– Inuppassuit misigisimapput urani pillugu paasissutissiinermik innuttaasullu taasitinneqarnissaannik apeqqummi saneqqutaaginnarneqarsimallutik, taanna inassuteqaammini allappoq.
– Tamanna uppernarsarneqarsimavoq HS Analysep misissuineratigut: Innuttaasut amerlanerussuteqarluartut uranimik piiaanissaq pillugu taasisitsinissaq kissaatigaat.
Inuit Ataqatigiit siunnersuutiginikuuvaat akuersaanngilluinnarneq pillugu innuttaasunik taasisitsisoqassasoq, siunnersuulli akuerineqanngilaq. Siunnersuutaat atuutilissagaluarpat Inuit Ataqatigiit innuttaasunik taasisitsinissaq angusinnaassagaluarpaat.
Taasisitsineq kinguarsaataasinnaavoq
Tamannarpiarli Inatsisartuni partiit allat iluarinngilaat.
– Demokraatit kissaatiginngilaat ikinnerussuteqartut innuttaasut taasitinneqarnissaannik piumasaqarnermikkut inatsisit malillugit demokratiskimik ingerlatsineq kinguarsarsinnaassagaat akisusarlugulu, assersuutigalugu Justus Hansen (D) oqaaseqartutut oqalugiaammini allappoq.
Aamma Siumut isumaqarpoq Inatsisartunut ilaasortat aalajangiisartuusut eqqortut.
– Pissusissamisoortutut isigaarput Inatsisartut, inuit qinigaattut, amerlanerussuteqarnermik tunngavik malillugu pisariaqartunik aalajangiisassasut, Anders Olsen (S) oqaaseqartutut oqalugiaammini allappoq.
Naalakkersuisut nangaasaaaripput
Allaammi partiimi illua'tungiuteqataasumi Partii Naleqqami siunnersuut ilalerneqanngilaq.
– Isummavut amerlanerussuteqartunit akuerineqanngikkaangaata pineqartoq pillugu innuttaasunik taasisitsineq ileqqorilissagutsigu tamanna ajornartorsiutinik takuneqarsinnaanngitsunik kinguneqassaaq, Hans Enoksen (PN) oqarpoq.
Taamaasillunilu naalakkersuisut piumasaqartik pissagunarpaat: innuttaasunik taasisitsisoqartassaaq taamaallaat Inatsisartuni amerlanerussuteqartut tamanna kissaatigippassuk.