Qassimiuaarneq
Innuttaasut ataatsimiinneranni islandimiu: Aalisarnersi pilersaarusiorlugu
Aalisarnerup aaqqissuuteqqinnerani siumut ukiumut 30-nut eqqarsarnissaq akilersinnaavoq, Islandimi aalisarnermik ingerlatsisuneersoq Haukur M. Gestsson oqarpoq
Silassaq misissorluareerlugu pitsaanerulerunanngimmat Nuummi innuttaasut ataatsimiinnerannik nutaamik aaqqissuussisut aalajangerput ataatsimiiffik nuunneqassasoq.
Qassimiuaarneq ulluni tulliuttuni Inussivimmi nanginneqassaaq.
Aalisarneq siuariartortoq
Nuuk Playgroundimili oqalliseqataasut qitittartullu siulliit siallernera soqutiginngilaat.
Innuttaasut ataatsimiinnerata ammarneqarnerani nalunaajaatit pissanganarnerpaat ilagaat Islandimiup Haukur M. Gestssonip saqqummiussinera.
Taanna Iceland Ocean Cluster Housemi atorfilittut islandimi aalisarnermut siuariartortumut ilaavoq, tassanilu aalisarneq nunatsinnit allaanerulluinnartumik aaqqissuussaavoq.
– Isumaqarpunga tamatumani Kalaallit Nunaata uagut Islandimiut ilinniarfigilluarsinnaagaatigut. Aalisarnersi sorpassuartigut uagut 1970-ikkunni aalisarnitsinnut assinguvoq, Haukur M. Gestsson oqarpoq.
Siunissamut sivisunerusumut eqqarsarlusi
Taassuma oqallinnermi saqqummiussaa ersarippoq aammalu politikerinit Aalisarnermullu Naalakkersuisoqarfimmeersunit, Qassimiuaarnerup ammarneqarnerani najuuttunit, paatsoorneqarsinnaanani.
– Pingaaruteqarpoq ingerlatsinerup pilersaarusiornissaa, aalisarnermi sæsonimut ataasiinnaanngitsumut, piffissamulli sivisunerusumut - immaqa ukiunut 20-nut 30-nulluunniit.
Gestssonip erseqqissarpaa Islandip aalisakkanik avammut tuniniaanera iluamik ingerlallualersimasoq inuussutissarsiut anguniagaqarnerusumik piffissamullu sivisuumut aqunneqalermat.