Innuttaasunut akuulersitseqqittarneq iluatsinneq ajorpoq

- Kalaallit pineqaatissinneqarsimasunut inissiisarfii paarnaarussivinni inissiisarfinnilu ajornerpaat ilaannik iluseqarput.

Annemette Nyborg Luaritsen Ilisimatusarfimmeersoq Kalaallit Nunaanni inatsiseqarneq pillugu ullumi Folketingimi tusarniaanermi taama ersaritsigisumik oqariartuuteqarpoq.

Atuaruk: Inatsisinut atuutsitsinermi suli ajornartorsiuterpassuaqartoq

Ulloq naallugu inissiisarfimmi
Tusarniaanermi pineqaatissinneqarsimasut inissiisarfiinut innuttaasunullu ilaalersitseqqinnermut apeqqutit ajornartorsiutit annerit ilaattut erseqqissaatigineqarput.

Pineqaatissinneqarsimasunut inissiisarfiit taamani pilersinneqarmata pineqaatissinneqartut tassani unnuiinnaratartussaagaluarput, tamatumalu saniatigut kisianni inuiaqatigiinnut attaveqarneq attatiinnarlugu ullukkut inissiisarfiit avataanni sulisinneqartartussaanikuupput. Kalaallit Nunaanni taamaattumik 'pineqaatissiisoqartarpoq' 'pillaatisisoqarani'.

Danskit paarnaarussiviini pineqaatissinneqartut ulloq tamaat tassaniittarnissaat tunngaviusumik eqqarsaataavoq, taamaattuimillu suliaqarnissamut, sunngiffimmi sammisassanut, naalagiarnissamut allanillu periarfissanut aaqqissuussaapput.

Kalaallit inissiisarfiit tamakkuninnga amigaateqarlutillu periarfissaqanngillat. Pineqaatissinneqarsimasullu ulloq naallugu inissiisarfimmiittarnerat ajornartorsiutaavoq. Amerlanngitsuinnaat inissiisarfik qimallugu sulisarput.

- Innuttaasunut ilaalersitsisarneq Danmarkimi pitsaanerusoq
Danmarkip akerlianik Kalaallit Nunaanni pinerluttunut isumaginnittoqarfimmi innuttaasunut akuulersitseqqittarneq tunngaviusumik naak eqqarsaataagaluartoq, Annemette Nyborg Lauritsenip piviusoq allaasoq isumaqarpoq.

- Danmarkimi innuttaasunut akuulersitseqqittarneq ullumikkut Kalaallit Nunaannit annertunerusoq oqaatigissavara, taanna tusarniaanermi oqarpoq.

Innuttaasunut ilaalersitsinerup illuatungerluinnaanik ullumi pisoqartarpoq.

- Pineqaatissinneqarsimasut ulloq naallugu inissiisarfimmiittarput, paarnaarussivimmilu avatangiisimut pulatinneqartarlutik.

Taamaattumik pineqaatissinneqarsimasunut ilinniarnermik aamma isumalimmik suliaqartitsinermik pilersitsisoqarnissaanik ujartuivoq.

Inissiisarfiit suna isuma tunngavigalugu ingerlanneqassanersut politikerit oqallisiginninnissaannik aamma ujartuivoq.

- Maanna sammiveqanngitsuinnangajammik ingerlasoqarpoq.

Akisussaaffik isumaqatigiiffiunngitsoq
Pinerluttunik isumaginnittoqarfimmi ajornartorsiutit ilisimaneqarluarput, arlaleriarlutillu nammineq isornartorsuineq saqqummiuttarpaat.

- Inissiisarfiit avataanni iluaniluunniit suliaqartitsineq annikippallaarpoq, Nunatsinni Pinerluttunut Isumaginnittoqarfimmeersoq, Mie Wulff oqarpoq.

Pinerluttunut Isumaginnittoqarfik ukiuni aggersuni inissiisarfinni sulinerup aamma ilinniarnissamut periarfissat nukittorsarneqarnissaat toraagaqarlutik suliniutiginiarpaat.

- Kisianni pinerluttunut isumaginnittoqarfiup innuttaasunut akuulersitsineq kisimi kivissinnaanngilaa. Oqartussaqarfiit allat ikiuutissapput, Mie Wulff oqarpoq.

Tassanerpiarlu innuttaasunut ilaalersitsinissamut akisussaaffik sumi inissisimaneranut ersernerlulersitsisoq ersarissivoq. Iliuuseqannginnerup amigarnerata pinerluttunut isumaginnittoqarfiup suut isumagissaneraat aamma inunnik isumaginnittoqarfiup suna akisussaaffigineraa ilaatigut ersarinnginneranik pissuteqarpoq.

Isumaginninnermut inatsisinillu atuutsitsinermut naalakkersuisoqarfik aamma Nunatsinni Pinerluttunut Isumaginnittoqarfik apeqqummi tassani ersarissumik isumaqatigiinngissuteqarput.

Isumaginninnermut inatsisinillu atuutsitsinermut naalakkersuisoq, Sara Olsvig (IA), erseqqissaasoqarnissaanik neriorsuivoq.

- Suleqatigiissitamik naapiffinnik aalajangersaasussanik pilersitsinikuuvugut, taamaalilluni kikkut suna akisussaaffigineraat erseqqissarneqassaaq.

Naalakkersuisut nakuusertartunut katsorsaanissamut suliniutaat aallarteqqammertoq illuatungeriit suleqatigiissutigisinnaalluarlugu, taassuma aamma Mie Wulffip tikkuarpaat.

Tusarniaaneq folketingip eqqartuussiveqarnermut ataatsimiititaliaata aamma Nunarput pillugu ataatsimiititaliap aaqqissuuppaa.