Sermersooq
Innuttaasunik nutaanik tikilluaqqusineq
Kommuneqarfik Sermersooq illoqarfiup innuttanngorlaavinut 100-t sinneqalaartunut tikilluaqqusinermik aaqqissuussivoq
Innuttaasut nutaat 100-t sinnilaarlugit amerlassusillit tikilluaqqusilluni aaqqissuussinermut peqataapput bussinik angalaaqatigiinnermik, aliikkusersorneqarnermik, peqatigiiffinnik sunngiffimmilu sammisassaqartitsinermut tunngasunik ilisimatinneqarlutik. Kommuneqarfik Sermersooq Nuummi innuttaasunut ilinniartunullu nutaanut pingasunngornermi sepembarip 9-ani tikilluaqqusilluni aaqqissuussivoq.
Taama Kommuneqarfik Sermersooq tusagassiorfinnut nalunaarummi paasissutissiivoq.
Atuaruk: Allagartalersuinerup angalaarnissaq ajornaannerulersissagaa
Nuannaajallannartoq
Aaqqissuussinermut taama amerlatigisut takkussimanerat borgmesterimit Asii Chemnitz Narupimit nuannaajallaatigineqarpoq kommunilu aaqqissuussinerup uteqqinnissaanik taamaalilluni aalajangerluni.
- Nuannaarutigaarput innuttaasut nutaat taama amerlatigisut ualeq atorlugu uagutsinnut pulaarnissaminnut atorusummassuk. Takusinnaavarput aaqqissuussinerit assingusut ornigarneqarluartartut taamaattumik iluatsitsilluarnerput tunngavigalugu aalajangerpugut qaammatit pingasukkaarlugit uteqqittassallugu, borgmester Asii Chemnitz Narup oqarpoq.
Angallassisulerluni busserneq
Bussinik angalaarnermi minutsinik 45-nik sivisussuseqartumi innuttaasut nutaat illoqarfimmi angallanneqarput, borgmesterilu periarfissaq iluatsillugu imminut ilisaritilluni Nuummilu nutaatut innuttanngortut tikilluaqqullugit.
Nuutoqqaq, illoqarfiup qeqqa, Sana aamma Nuussuaq aqqusaarneqarput ingerlaarnermi paasissutissat peqqinnissaqarfimmut tunngasut, bussinut, atuarfinnut aammali illoqarfiup oqaluttuassartaa, aqquserngit atsersorneqarnerinut tunngaviit oqaluttuarineqarlutik, sapaallu kulturikkut qanoq immersorneqarsinnaanersoq siunnersuutigineqarluni.
Iluatsilluartumik aaqqissuussinerup tamatuma kingorna tikilluaqqusilluni aaqqissuussineq qaammatit pingasunngornerit tamaasa ingerlanneqartalissaaq.
Atuaruk: Kommunalbestyrelsip ataatsimiinnera tv-iikkut malinnaaffigiuk