undersøgelse

Innuttaasunik misissuineq ingerlanneqalerpoq

1993-imiilli innuttaasunik misissuinerit sisamassaat aallartinneqarpoq. Naalakkersuisunut ilaasortap Steen Lyngep, Atassut, kikkut tamaasa peqataaqqullugit allagarsisimasut kajumissaarpai tamatumunnga peqataaqqullugit

Peqqik innuttaasut peqqissusaannik misissueqqissaaq. Innuttaasunik misissuinerit sisamassaat aallartinneqarpoq.

– Innuttaasunik misissuinikkut innuttaasut peqqissusaasa ineriartornerat qulaanarneqartarpoq, tassuunalu akissutissarsineqartarpoq peqqissuunerput eqqarsaatigalugu sutigut annertunerpaanik unammilligassaqartugut. Peqqinnissami anguniagalimmik tulleriiaarisumillu suliniuteqassagutta ilisimasat tamakkua atorfissaqartippavut, taamaattumillu innuttaasunik misissuineq innuttaasut peqqissusaasa pitsaanerulernissaanik Naalakkersuisut suliniutaanni qitiulluinnartumik atortussaavoq, peqqissutsimut attaveqarnermullu Naalakkersuisoq Steen Lynge, Atassut, oqarpoq.
Taassuma kikkut tamaasa peqataaqqullugit allaffigineqarsimasut kajumissaarpai tamatumunnga peqataaqqullugit.
– Peqataanissat pingaaruteqarpoq, maannakkorpiaq aammalu kinguaariit tulliuttut eqqarsaatigalugit, Steen Lynge oqarpoq.
Innuttaasunik misissuineq siusinnerusukkut ingerlanneqartarsimavoq 1993-1994-imi, 1999-2001-imi aamma 2005-2010-mi. Maanna misissuinermi peqataasussatut toqqarneqartut 2600-t aamma siusinnerusukkut misissuiarnerni peqataasarsimapput. Taamaasilluni periarfissaqarpoq peqqissutsip, nappajassutsip inuunermilu atugassarisat ineriartornerat takussallugit, takussutissiillunilu innuttaasut peqqissusaannut programmip Inuuneritta atuutilernerata siorna kingornalu innuttaasut qanoq peqqissuseqarnersut.
Misissuinermi inuit ataasiakkaarlugit apersorneqartarput, immersugassanik immersuisarput nakorsanillu assigiinngitsunik misissorneqartarlutik, soorlu aap qaffasissusia aamma orsoqarnermut procenti. Ilamerngi aamma aaversinneqartarput. Peqataasut ilaatigut aperineqartarput makkununnga tunngasunik: imigassaq, pujortartarneq, timip aalatittarnra, nerisat aammalu peqqinnissaqarfimmik naammaginnissusiannik.
Misissuinerup ilaatut aamma peqqataasut tamarmik nalunaarsuiffimmik malitseqartinneqartarput tassa toqunermut pissutaasunut nalunaarsuiffimmut, kræftertunut nalunaarsuiffimmut aamma nuna tamakkerlugu napparsimasunut nalunaarsuiffimmut.
Innuttaasunik misissuineq Nuummi aallartissaaq, ukiullu ingerlanerani ilisimatuut illoqarfinnut nunaqarfinnullu tikeraartassapput. Naatsorsuutigineqarpoq misissuineq pillugu nalunaarusiaq siulleq 2015-imi tamanut saqqummiunneqassasoq.

Powered by Labrador CMS