Innuttaasunik kiffartuussinerup pitsaanerunissaa akikinnerunissaa iluaqutaanerunissaalu anguniarneqartoq

Kommuneqarfik Sermersooq ullumi ataasinngornermi siunissamut pingaarutilimmik saqqummiussaqarpoq.

Kommunip periusissaa nutaaq saqqummiunneqarpoq.

Suliffeqarfik ingerlalluartoq, aningaasaqarneq patajaatsoq pitsaanerusumik, sukumiinerusumik immaqalu akikinnerusumik innuttaasunik sullissineq. Tassa taakkuupput Kommuneqarfik Sermersuumi periusissami nutaami 'Sermersuaq Ikaarlugu – Siunissaq Ataatsimoorullugu'-mi anguniakkat.

- Kalaallit Nunaata oqaluttuarisaanerani nutaajunerusumi siullermeersumik pisortanit oqartussaatitaasoq siunissaq pillugu periusissatut najoqqutassiamik suliaqarpoq. Sulisut ineriartornerannut sulinerullu nuannersuutinnissaanut sunniuteqarluarumaartoq kiisalu uagutsinnut sulisut pikkorissut pissarsiarinissaannut tigummiinnarnissaannullu oqinnerulerumaartoq naatsorsuutigaarput, Kommuneqarfik Sermersuumi pisortaaneq Steffen Ulrich-Lynge, tusagassiutinut nalunaarummi oqarpoq.

Periusissaq sisamanik immikkuualuttortaqarpoq, taaguuserneqarsimasunik:

• Peqatigiilluta alloriassaagut.
• Koruunit tamaasa akisussaaffigissavavut.
• Nuannaarluta iliuuseqassaagut.
• Oqaloqatigiinnikkut akisussaassuseqarnikkullu kingunilimmik iliuuseqassaagut

Peqatigitillugu aqutsisutut tunngavissat pilersinneqarsimapput, pingaartitallu pingasut toqqarneqarsimallutik, siunissami suliffeqarfimmi sunniiniutitut atugassat, tassaasut: ataqqinninneq, ineriartorneq akisussaaqataanerlu.

Sulisunut qitiusumik inissisimasunut toqqakkanut 130-nut ataasinngornermi apriilip 20-anni NUIF-imi ataatsimiinnermi periusissaq saqqummiunneqassaaq