Innuttaasunik ataatsimiititsinissaq sioqqullugu sulisut qullersallu oqaloqatigiipput

Qasigiannguani Royal Greenlandip aalisakkanik suliffissuani sulisussaaleqinermik oqallinneq, unnugu innuttaasunik ataatsimiititsinissaq sioqqullugu annertuseriaqqippoq.

Royal Greenland nalunaaruteqarsimavoq suliffissuaq sulisussaaleqisoq. Aalisakkanilli suliffissuarmi sulisussaaleqinermut pissutaasoq sulisut sinniisuiata suliffissuullu pisortaata isumaqatigiinngissutigaat.

Sulisussaaleqinerup ilaatigut kingunerisimavaa tallimanngornikkut unnukkut sulisartut tunisassiortarunnaarnerat, tamakkua suliartoratik angerlarsimaannarusuttarsimammata.

Qullersat pisuupput

Taamaattumik tallimanngornikkut tunisassiortarneq sapaammut nuunneqarsimavoq. Sapaatip akunnerani kingullermi tallimanngornikkut sulisut 15-iinnaat suliartorsimapput, tunisassiassat tamakkernissaannut sulisut 40-t atorfissaqartinneraluartut.

Sulisut sinniisuat Gaba Rosbach maanna oqarpoq, sulisussaaleqineq pissuteqartoq qullersat aqutsinerlunnerannik, tamannalu kinguneqarsimasoq aalisakkanik suliffissuarmi suleqatigiinnerup qaqutigoortumik nuanniissuseqarneranik, tamannalu pissutigalugu aalisakkanik suilffissuarmi sulisut suliffissuup pisortaa, Henrik Hagen pisortaralugu sulinissartik nuannariunnaarsimagaat.

– Suliumassuseqarneq sulinermillu nuannarisaqarneq peerussimapput. Qullersat akornanni qanigisanik pingaarnerutitsineq ersarippoq, ilaatigut qanigisat pisanik tunitsivimmi atorfinitsinneqarsimallutik, tamannalu sulilsut qatsussimavaat. Taamaattumik amerlasuut tallimanngornikkut angerlarsimaannarusuttalersimapput, sulisut sinniisaat oqarpoq.

Gaba Rosbachip oqaatigaa sulinermi atugassarisat aatsaat taama ajortigilersimasut. Taassuma neriuutigaa ajornartorsiutit erloqinartut, sulisorpassuit akaarinnikkunnaarnerannik kinguneqarsimasut, ataavartumik aaqqiiffigineqarumaartut.

Inummik kinaassusaa pillugu saassussisoq

Frank Hagenip, 2004-mi Qasigiannguani aalisakkanik suliffissuarmi pisortatut atorfinitsinneqarsimasup, sulisut sinniisuaata taamatut sakkortutigisumik isornartorsiuinerani paasisinnaanngilaa, tamannalu isigaa kinnaassutsiminik saassussinertut, qallunaajunini pissutigalugu.

Ilanngulluguli oqaatigaa tallimanngornikkut tunisassiorneq sapaammut nuunneqarneranut pissuteqartoq, sulisartut tallimanngornikkut suliartortannginnerannik.

– Sulisartuvut takkutinngitsuuinnavittarput, tamannalu pissuteqarpoq sulinissamik soqutiginninnginnermik, tamannalu ajornartorsiutaavoq annertooq.

Sulisut arlallit mianersoqquneqarsimapput

Taassuma oqaatigaa suliumannginnerup kingunerisaanik tunisassiornerup appariarujussuarsimaneranik tunisassiallu pitsaanngitsuusut. Frank Hagen isumaqarpoq kalaallit, aalisakkanik suliffissuarni, pisortatut sulinissamut ilinniagaqarsimasut ikippallaartut.

Qasigiannguani qullersat sulisutik suliffimmik paarsinerluttut soraarsittarsimavaat, taamatuttaarlu oqaasiinnartigut allakkatigullu mianersoqqussuteqartarsimalluti, tamakkualu soqutigineqartarsimanngillat.

Suliffissuup pisortaa naapertorlugu sulisut sinniisuata isornartorsiuinera inummut tunnganeruvoq, suliamik pissuteqarnerunani.

– Ilaasa ajortorsuartut isigaannga. Ilat isumaqarput atorfiga qallunaamik inuttaqartariaqanngitsoq. Gaba Rosbachilu suleqatini sinnerlugit taamatut isornartorsiuinngilaq. Suleqatini tusarniarfigisimanngilai. Nalunngilara namminerpiaq isummaminik taamatut saqqummiussisoq, taanna oqarpoq.

– Sulisut suliartorumaneq ajorput, tamannalu suliamut kajumissuseqannginnermik pissuteqarpoq.

Allatigut mianersoqqussummik tunineqarpoq

Frank Hagenip ataasinngormat Gaba Rosbach pimoorussamik oqaloqatiserisimavaa, tassani Rosbach qinnuigalugu aviisimi Tamanut Avannaani isornartorsiuineranik suna tunuliaqutaanersoq nassuiaateqaqqullugu.

Gaba Rosbachip uppernarsarpaa taamatut oqaloqatigiissimallutik.

– Naveersingaatsiarpunga, allakkatigullu mianersoqqussummik tunineqarlunga, taanna oqarpoq.

Taanna aalisakkanik suliffissuaq ajornartorsiutilik pillugu annertunerusumik oqaaseqarumanngikkallarpoq.

Sulisut sinniisuat unnerluuppaa

Suliffissuup pisortaa Frank Hagen isumaqarpoq suleqatigiinnermik ajornartorsiuteqartoq, sulisut sinniisuat sulisut sinnerlugit oqaaseqaateqanngimmat, isumaqarporlu tamanna pissutigalugu sulisut sinniisuata atorfini annaaratarsinnaagaa.

Innuttaasunik ataatsimiititsineq, pissutsinik tamanik oqalliffiusussaq, unnugu pingasunngornermi nalunaaqutaq 18 Qasigiannguit timersortarfianni ingerlanneqassaaq. Ataatsimiinnissaq tamanut ammavoq, taannalu aaqqissuunneqarsimavoq Royal Greenlandip HR-imut immikkoortoqarfianit, Qasigiannguani aalisakkanik suliffissuarmit, SIK-mit aamma Qaasuitsup Kommunianit.