Nuuk
Innuttaasunik ataatsimiititsinermi Naalakkersuisunut apeqqarissaartoqartoq
Naalakkersuisut Katuami Nuummi innuttaasunut ataatsimiititsimmata tusarnaariartut amerlasuut naalakkersuisunut apeqquteqarput
Naalakkersuisut siulittaasuat Aleqa Hammond Siumut siuttoralugu innuttaasunik ataatsimiititsisoqarpoq kulturikkut illorsuarmi Katuami Nuummi ippassaq ataasinngornermi.
Innuttaasut 100-t missaanniittut ataatsimiinnermi peqataapput.
Ataatsimiinneq aallarnerlugu Aleqa Hammondip Naalakkersuisut suliaat ukiunilu tulliuttuni suliassatut pilersaarutaat kiisalu Naalakkersuisut Inatsisartut upernaakkut ataatsimiineranni inatsisissatut siunnersuutaat ilisimatitsissutigai. Naalakkersuisuni ilaasortat oqartussaaffimminni suliarisatik Naalakkersuisoqarfiillu Inatsisartunut saqqummiussassaat aamma ilisimatitsissutigaat.
Naalakkersuisut tamangajammik peqataapput, ilinniartitaanermut, ilageeqarnermut, kultureqarnermut naligiissitaanermullu naalakkersuisoq Nick Nielsen kisimi peqataanngilaq Arctic Winter Gamesertuni peqataanini pissutigalugu.
Saqqummiussinerit kingorna peqataasunit apeqquteqarusuttoqarluarpoq. Naalakkersuisoqarfinnut assigiinngitsunut apeqqutigineqartut assigiinngisitaarluarlutik:
- Nuummi inissaaleqinerup annertunera innuttaasunit eqqummaariffigineqartoq malunnarpoq, apeqqutigineqartunut ilaammat namminersortut minnerusunik suliffiutillit annertunerusunik suliakkiisarnerni qanoq peqataatinneqarnerulersinnaanerat
- Peqqissaanermut sivisuumillu nappaateqartunut katsorsaanermut tunngasut aamma tikinneqarput ilaatigut sivisuumik katsorsarneqartariaqartunik nappaatillit nunatsinni katsorsarneqarsinnaalernissaannut periarfissat paaserusunneqarlutik
- Utoqqalinersiaqartitsinermi allaffissorneq pitsaanerusumik aaqqissuunneqarsinnaannginnersoq aamma apeqqutigineqarpoq
- Nunaqavissut ilinniagaqarsimasut suliffissaaleqisullu atorluarnagit avataaniit tikisitsiinnartarneq sooq suli atuunnersoq apeqqutigineqarpoq
- Avannaani qaleralinnut umiarsuarnik tunitsiviliinermi tunngaviusut paaserusunneqarput
- Naalakkersuisuni ilaasortat nunani allani angalanerminni aatsitassanut tunngasunik paasisatik qanoq atorniarneraat apeqqutigineqarpoq
- Inatsisitigut ataataqanngitsut pillugit suliassat tulliit sunik imaqarnissaat apeqqutigineqarpoq
Naalakkersuisut siulittaasuata Aleqa Hammondip innuttaasunik ataatsimiititsineq ima oqaaseqarfigaa:
- Innuttaasunut ataatsimiitsitsinitsinnut takkuttorpassuaqarnera nuannaarutigaara peqataasullu assigiinngitsunik suliatsinnullu attuumassuteqarluartunik apeqquteqaqattaarput Naalakkersuisuni ilaasortat peqataasut akissuteqarfigisinnaasaannik. Uanga Naalakkersuisunilu ilaasortat innuttaasut ataatsimiitsitsinermut peqataasut soqutiginnilluarlutik apeqqutissaqarluarlutillu takkunnerat qujassutigaarput, ataatsimiitsitsinerup takutilluarmagu innuttaasut sunik paaserusutaqarlutillu eqqarsaateqarnersut. Taamaammat Nuummi innuttaasunik aappaagu Inatsisartut upernaakkut ataatsimiinissaat sioqqullugu ataatsimiitsitseqqinnissarput siunniupparput.