Innersuussut: Kunngeqarfik Kalaallit Nunaat pillugu Kinamut isumaqatigiissumik atsiortariaqarpoq
Kinap Kalaallit Nunaanni ilannguttarneranut tunngatillugu erseqqarissunik periusissanik pilersitsisoqartariaqartoq, Dansk Institut for Internationale Studier innersuussivoq.
Annonse
Kinap Issittumi aamma Kalaallit Nunaanni soqutiginninneruleriartorneranut tunngatillugu, erseqqissunik isumaqatigiissuteqartoqarnissaa aqqutissaavoq. Dansk Institut for Internationale Studiermit (DIIS) tamanna innersuussutigineqarpoq.
Kinamiut kalaallit suliniutaannut ilanngunniartarnerinut tunngatillugu, Danmarkip Kalaallit Nunaalu akornanni akerleriissuteqartoqaqqajaasarpoq. Kinamiut mittarfiliortiternissamut aningaasaliinissamut soqutiginninneranni tamanna kingullermik pivoq.
Danmarkip, Kalaallit Nunaata aamma Kinap akornanni periusissat qanoq malittarisassaqassanersut DIIS maanna erseqqilluinnartunik pingasunik innersuussuteqarpoq.
- Kalaallit Nunaat aamma Issittoq pillugu Danmark Kinamut suleqatigiinnissamut isumaqatigiissummik atsioqateqartariaqarpoq. Kinamiut Kalaallit Nunaanni suliniuteqarniartillugit periarfissat aamma killigititassat isumaqatigiissummi allaatigineqassapput.
- Namminersorlutik Oqartussat piaanermut aamma attaveqaqatigiinnermut tunngasunut suliniutinut tunngatillugu akuersissutinik tunniussinermut, niuernikkut akilersinnaassutsinik misissuinernut aamma aarlerinartoqarneranik misissuinernut erseqqissumik inatsisiliortariaqarpoq.
- Kalaallit Nunaata aamma Danmarkip suliniutit suut illersornissamut aamma sillimaniarnermut tunngasunut suliassaqarfinnut tunngassuteqarnersut qulaajarnissaat ujartussavaat. Namminersornermut Inatsimmut 2009-meersumut ilassutitut isumaqatigiissummut tamanna ilanngunneqassaaq.