qaqqaq innermik anitsisartoq
Innermik anitsisartup anitsinissaa ilimanarunnaajallappoq
Islandimi nunap sajunnerata kingorna qaqqap innermik anitsisartup anitsilernissaa ersissutigineqalerpoq, mianersoqqusinerli aappalaartumiit aappalungusersumut appartinneqarpoq.
Island Meteorologiske Kontorimi oqaaseqartartut oqaatigaat qaqqap innermik anitsisartup anitsinissaanut ulorianartorsiorneq aappalaartumiit aappalungusersumut appartinneqartoq.
Taamatut aalajangiisoqarpoq allaffimmit geofysikerit siusinnerusukkut nalunaareersut nunami qaqqat innermik anitsisartut annersaata, Bardadrbunga-p, ullorpaalunni anitsinngujoorsimasup, ataani marloriarluni nuna sajuttarsimasoq.
– Nunap sajunneri 5,3 aamma 5,1-imik sakkortussuseqarput. Sapaatit akunnerini kingullerni nunap sajunneri aatsaat taama sakkortutigimmata qaqaaq innermik anitsingajalerunarpoq anitsilereersimalluniluunniit.
TDassa imaappoq, arsaq annertoorujussuaq silaannarmut qullarsinnaavoq, geofysiker Gunnar Gudmundsson, Islands meteorologiske instituttimeersoq, sapaammi siusinnerusukkut oqarpoq.
Ulorianartorsiornerli maanna appartinneqarpoq.
Gudmundsson oqarpoq piffissaq tamaat nalunartuaannarsimasoq qaqqaq annertuumik anitsilissanersoq, aammalu nalornineqarsimalluni qaqqaq innermik anitsilissappat magma nunap qaavanut appakaatissanersoq.
Magna tassaavoq qaarsoq aannikoq, nunap qaavanut piguni lava-ngortartoq. Sapaatit akunnerini kingullerni nuna annikkitsumik sajulaaqattaartarsimavoq, qaqqaq innermik anitsisartoq sajuppillatsillugu, taannalu sermimi Vatnajökull-imiippoq. Arfininngormat nuna sakkortunerpaamik sajummat 4,5-imik sakkortussuseqarpoq.
Qaqqaq annertunerusumik anitsilissagaluarpat tamanna timmisartornermut annertuumik kinguneqassaaq, soorlu 2010-mi taamaassimasoq. Taamanikkut ermip Eyjafjallajókull-ip ataani qaqqaq innermik anitsisartoq anitsivoq arsanillu silaannarmut qullartitsilluni.
Tamanna pissutigalugu Euorpami aammalu Atlantikoq qulaallugu USA-mut timmisartuussinerit sapaatit akunnerini arlalinni akornusersorneqarput.