innarluutillit
Innarluutillit 132-it Danmarkimiitinneqarallartut
Ukioq kingulleq innarluutillit 132-it Danmarkiliaanneqarput. Isumaginnernermut Naalakkersuisup, Sara olsvigip nalunaarsorsimasaani takussutissaqarpoq.
Paasissutissat Inatsisartunut ilaasortamut, Anthon Frederiksenimut (PN) akissuteqaatineerput.
Aningaasartuutit: 114,3 millionit koruunit
Innarluutillit Danmarkimiitittarneri akikitsuinnaanngilaq. Ukioq kingulleq pisortanit aningaasaliissutit katillugit 114,3 mio koruuninik amerlassuseqartut, paragraf 37-imi akissuteqaammi paasinarsivoq.
Kommunalbestyrelsi annikinnerpaamik ukiumut ataasiarluni pineqartut Kalaallit Nunaannut uternissaanut periarfissat misissortassavai.
Angerlarusunngitsut
Innarluutillit ilaat Nunatsinnut angerlarumassanngikkaluarpata nunatta akilersortuaannassavaat? Anthon Frederiksen aperivoq.
Ersarissumillu akissuteqarfigineqarani imatut akissuteqarfigineqarpoq innuttaasut piginnaatitaaffiinik misissueqqissaarnikkut nalilersuinernut ataasiakkaanut aalajangersimasumut tunngavoq, 'pissutigalugu Inuit innarluutillit pillugit FN'p Isumaqatigiissutaa naapertorlugu kiisalu nunamiiffigisap inatsisai, tassa danskit inatsisaat, naapertorlugit kalaallit innuttaasut pisinnaatitaaffeqarmata'