Kanngutsaatsuliornerit
Innarliinerit soraarummernermik taamaatitsisoq: Niviarsiaraq kivilerneqartoq
Niviarsiaraq inuusuttoq ullaatungaani Nuummi Ukaliusap Atuarfiani soraarummeertunit arlariinnit qilersugaariarluni kivilerneqarpoq. Arlallit assilisaarinerisa nalaani niviarsiaqqap nalikkaavi nittarsaanneqarput. Ataataasoq FB-mini taama allappoq. Atuarfimmi soraarummeerneq taamaatinneqarsimavoq, atuartulli tamarmik angerlatinneqarsimallutik.
Nuummi Ukaliusap Atuarfiani soraarummeertut ilaat pingasunngornerup ullaatungaani killissamik qaagiisimapput.
Taakku niviarsiaraq inuusuttoq qilersoriarlugu kivilersimavaat. Arlallit assilisaarinerisa nalaani niviarsiaqqap nalikkaavi nittarsaanneqarput. Niviarsiaqqamut ataataasoq Facebookimini taama allappoq.
Misiginerlutsinneqarsimasut ataqqiniarlugit Sermitsiaq.AG-p atiinik saqqummiussinianngilaq.
10. klassertut tamarmik angerlartinneqartut
USK-imi atuarfiup pisortaanerata Karno Lyngep, pisoq iluamik suli ilisimasaqarginagu oqaatigaa - kisiannili atuartup ataasiinnaap taamaaliorsimasinnaanera, tamanulli sunniuteqarnerluttoq, taassuma tusarsimavaa.
- Inuup ataatsip piliaa, allanut tamanut sunniuteqarnerluppoq, Karno Lynge Sermitsiaq.AG-mut oqarpoq, taassumali pisumut arlallit peqataasimasinnaanerat akerlilersunngilaa. Soraarummeerneq taamaatinneqartoq, atuarfiup pisortaanerata oqaluttuaraa.
- Suna tamarmi taamaatinneqarpoq, 10. klassertulli tamarmik angerlatinneqarput.
Atuartut marluk eqqugaasut
Atuartut marluk kivilertissimasut, atuarfiup pisortaanerata oqaluttuaraa. Nukappiaraq 7. klassemi atuartoq aammalu niviarsiaraq 9. klassemi atuartoq.
Sermitsiaq.AG-p politiit pigaartuunerat oqaloqatigisimavaa, taassumalu unnerluutiginnittoqarsimanera uppernarsarpaa, pisumullu paasiaaleruttorlutik oqaatigalugu.
- Massakkorpiaq paasissutissanik katersuileruttorpunga, unnerluutiginninnerlu misissorparput, kisianni paasissutissanik sukumiinerusunik suli ilisimasaqanngilanga. Kisianni suliaq pimoorullugu suliaraarput, pigaartuuneq oqarpoq.