Innaarsunni innuttaasoq: Toqqissisimavugut

Innaarsunni innuttaasut toqqissisimasutut misigisimapput. Susanne K. Eliassen Innaarsunneersoq taama oqaluttuarpoq.

Innaarsunni innuttaasut nunaqarfiup avannaatungaani iluliarsuaq sillimatitsigaluartoq ajunngillat. Susanne K. Eliassen nunaqarfinni aqutsisunut ilaasortaq ilisimatitsivoq.

- Toqqissisimavugut. Taamatut oqarsinnaavunga, Susanne K. Eliassen, Sermitsiaq.AG-mut sapaammi ualikkut taama oqarpoq.

Inuit 33-t imaanut qaninnermi najugaqartut tallimanngormat qimagussortinneqartut, suli najukkaminnut angerlarsinnaanngikkallarput. Kisianni qimagussortinneqarsimasut arlallit nunaqarfinnut illoqarfinnullu aallarsimapput.

Aallartarlutillu tikittartut

- Qimagussorneqarsimasut amerlasuut ilaquttaminnut illoqarfinnut imaluunniit nunaqarfinnut allanut apersortittooriarlutik aamma nalliuttorsioriarlutik aallarnikuupput. Innaarsunni aallarnissamut tikinnissamullu ajornartorsiunngilagut, Susanne K. Eliassen, taama oqarpoq.

Nunaqarfiulli eqqaani angalasoqaleraangat iluliarsuarmik nakkutiginnittoqartarnera, taassuma oqaatigaa.

Aalisartut eqqugaasut

Aalisartut ingammik iluliarsuarmit Innaarsuit avannaatungaanni ikkarleqqasumit eqqugaasut, Susanne K. Eliassenip aamma oqaluttuaraa.

Aalisartut aalisariaqqusaanngillat, iluliarsuup aserussagaluaruni ulorianartorsiortitsinera pissutigalugu tunisiartorsinnaannginnamik, taanna oqarpoq.

Innaarsunni innuttaasut upalungaarsimasut ilitsersuinerat ataqqigaat, taanna ilisimatitsivoq. Ualikkullu anoreqarani seqinnilertarluni qulisimavoq.

Ataasinngornermi ullaakkut ataatsimiinniartut

Upalungaarsimasuutitaasut ataasinngornermi ullaakkut ataatsimiissapput, taakku ilaatigut Namminersorlutik Oqartussanit, Issittumi Sakkutooqarfimmit aamma Peqqinnissaqarfimmit sinniisoqarput. Taakku Innaarsunni qanoq pisoqarnissaanik aalajangiissapput.

Powered by Labrador CMS