Innaarsuit: Nunanit tamalaanit tusagassiorfiit nunaqarfimmik ukkatarinnissimapput
Qaammatip siuliani Innaarsuit saavanni iluliarujussuaq ikkarlittoq nunani tamalaani tusagassiorfinnit allaaserineqarpoq. Susanne K. Eliassen aamma nunaqarfimmeersut allat saaffigineqaqattaarput.
Nunaqarfinni aqutsisut siulittaasuata Karl Petersenip iluliarujussuaq 11 millionit tonsinik oqimaassuseqartoq Innaarsuit saavanniittoq, nunaqarfimmi innuttaasunik ulorianartorsiortitsisoq maluginiaqqummagu, kalaallit tusagassiorfiini aamma inuit attaveqaqatigiittarfiini saqqummerpoq. Kingornalu nunaqarfimmi innuttaasut videoliaat assilisaallu nunani tamalaani tusagassiorfinni siammarterneqarput.
Saaffiginnittorpassuit
Susanne K. Eliassen nunanit allanit tusagassiorfinnit saaffigineqaqattaarsimasut ilagaat.
- Tusagassiorfinnit qulinit amerlanerusunit saaffigineqarpunga, amerlasuut Facebookikkut allaffigaannga. Ilaat nunanit allanit maani unnuakkut sianertarlutik. Tupinnaannarput sumit tamanit malinnaaffigineqarnerput, Susanne K. Eliassen oqaluttuarpoq.
Amerikamiut tv-eqarfiat CNN, inoqutigiinnit millionilikkaanit USA-mi silarsuarmilu tamani isiginnaaneqarsinnaasoq, tusagassiortumik assiliisunillu Innaarsunnut aallartitsipput. CNN-ip ilanngutassiaa uani takuuk.
- CNNip nunaqarfipput torrattorujussuarmik timmisartumik qulaallugu assilillugu ilanngutassiornikuuppt, Susanne K. Eliassen oqarpoq, taassumalu ilisimatitsissutigaa nunanit tusagassiorfik Innaarsunnut tikeraangajalersoq.
Al Jazeera English arabiamiut tv-eqarfissuannit pigineqartoq aamma CNN-ip Innaarsuunniinnerani tikeraarpoq, unalu ilanngutassiaraat.
Iluliarsuaq nikissimanngitsoq
Iluliarsuaq juulip qeqqanili Innaarsuit avannaatungaanut nikikkamili suli nikeqqissimanngitsoq, Susanne K. Eliassen Sermitsiaq.AG-mut ilisimatitsivoq. Nunaqarfimmilu innuttaasunut ullut nalinginnaasut atorneqaqqilersimapput.
- Oqartussat sillimaniarnikkut iperarallarnikuuaatigut, nammineq sillimaniarpugut. Kisianni iluliarsuaq saatsinnut peqqissappat, nalunaarutigeqqinneqassasoq ilisimatinnikuuaatigut.
Tupattut
Soorunami innuttaasut iluliarsuaq eqqumaniarfigeqqissaaraat oqaatigaa. Kisianni ippassigami innuttaasut tupassimapput.
- Iluliarsuarmit nakkartoqarneranit annikitsumik mallertitsitsimmat tamatta arpalluta iluliarsuaq takuniarparput, Susanne K. Eliassen illalaarluni oqaluttuarpoq.
Iluliarsuaq nutillunilu nakkariaannaasoq taassuma ilisimatitsissutigaa, kisianni innuttaasut toqqissisimapput.