innaallagiaq imerlu
Innaallagiamut imermullu akit tamanut assigiilissapput
Nukissiuuteqarnermut Naalakkersuisoq Hans Enoksen (PN), Naalakkersuisut innaallagiaqarnermut imeqarnermullu akinik aaqqissuusseqqinnerat saqqummiuteqqammerpaa. Illoqarfiit mikinerit nunaqarfiillu sipaarutinik malugisaqarnersaassapput
Innuttaasut inuunerminni atugarisaanni annertunerusumik naligiinnerulernissamik inuussutissarsiornermilu pitsaasunik atugaqarnissaq pillugu suliaqarnissaq naalakkersuisooqatigiinnissamik isumaqatigiissummi Inuussutissarsiornermut, Suliffeqarnermut, Niuernermut Nukissiuuteqarnermullu suliassaqarfianiittoq pingaartut ilagaat, tamanna ullaatungaani tusagassiortunik katersortitsinermi saqqummiunneqarpoq.
Assigiimmik akeqartitsineq eqqunneqaqqissaaq
Naalakkersuisut innaallagissamut imermullu assigiimmik akeqartitsineq eqquteqqikkusuppaat, taamaasillunilu innaallagissamut kWh-ikkaanut 1,60 koorunit akiliutigineqartalissalluni imermullu m3-ikkaanut 19 koruunit.
Illoqarfinni mikinerusuni nunaqarfinnilu innuttaasut sipaarniuteqarneq maluginerpaassavaat, assersuutigalugu Tasiilami ilaqutaariit marlunnik inersimarsortallit marlunnillu meerartallit ukiumut 8.000 koruunit sipaarrutigilersinnaassammassuk.
Akinik iluarsartuusseqqinneq allanit akilerneqassanngitsoq
Akit nutaat illoqarfinni innuttaasunut ullumikkut appasissunik akiliisareersut pilliutigalugit akit nutaat eqqunneqassanngillat, Nuummimi innuttaasut ullumikkut kWh-ikkaanut 1,63 koruuninik akiliuteqartartut, 3 øre'nik sipaaruteqalissapput.
Aalisakkanik suliffissuit najukkami immikkoortunut aningaasartuutit 41,5 procentiinik suli akiliisassapput, taamaattorli annertunerpaamik assigiimmik akigititamik, minnerpaamillu assigiimmik akeqartitsinerup 41,5 %-ianik.
56 million koruuninik sipaaruteqarneq
Naalakkersuisut ilimagaat, inuiaqatigiit katillugit 150 millionit koruunit sipaarutigisinnaagaat, atuisulli naliginnaasut 56,2 million koruuninik sipaaruteqarsinnaasut.
Iluarsaaqqinneq tassaavoq 2018-imut aningaasanut inatsimmut aappassaaneernissaanut Naalakkersuisut saqqummiussassaattut allannguutissatut siunnersuutip ilaa. Siunnersuutit Aningaasanut Inatsimmi Nukissiorfiup isertitai aningaasartuutaalu naleqqussarnerini aningaasaliiffigineqassapput, taassuma ataani:
Namminersorlutik Oqartussat, kommuunit ingerlatseqatigiiffiillu pisortanit pigineqartut innaallagissamik imermillu akinik appartitsinermi pissarsiarineqartut pisortanut immikkoortortat aningaasaliissutaasa apparneqarnerinik sipaarutit aningaasalerneqassapput.
Pisortat immikkoortaanut aningaasaliissutit appartinneri Nukissiorfinnut ingerlatsinermi tapissiissutit atorneqassapput.
- Najugaqarfinni minnerni inoqatitta ilarpassui ulluinnarni aningaasaqarniarnermikkut annertuunik unammillerfissaqarnerat tamatsinnut paasinarpoq. Akigititanik iluarsaaqqinneq manna aqqutigalugu kikkut tamarmik iluaqutigisassaannik nammaqatigiissumik iluarsiissuteqarneq Naalakkersuisut iluatsissimavaat, Hans Enoksen (PN) oqarpoq.