inimut akiliutit qaffannerat
Ini: Taamaattumik akit qaffassapput
Ineqarnermut akiliutit siullermik Qeqqata Kommuniani Kommuneqarfik Sermersuumilu atuutilissapput
Inissiat oqoqalertut suliarineqartariaqartarnerat A/S Inissiaatileqatigiit Inip aqutaani najugaqarfiit aningaasaqarniarnerannut ilungersunarpoq. Aningaasartuutit allat aamma pissutaapput ineqarnermut akiliutip qaffattariaqalerneranut, sullissinermut pisortaq Birthe Kielsen nalunaarpoq.
Inip 2014-mut missigersuutit naammassivai. Tassanilu paasinarsivoq unammillgassat soorlu oqummut aammalu iluarsagassanut allanut tunngasut akissaqartinneqassappata aningaasanik pissarseqqittoqartariaqartoq.
- Aningaasartuutit qaffattarput inissiat atorneqaratik uninnganeranni soorlu oqussimasut iluarsaannerisa nalaanni aamma ilaqutariinnut arlalinnut inissiat iluarsaattariaqarnerat, akiliinngitsoortut isertitassaraluanik annaasaqartitsigaangata, Birthe Kielsen nassuiaavoq.
Ineqarnermut akiliutit qaffaatissat amerlanertigut 1 procentip 8 procentillu akornanniissaaq tassanilu aamma namminersorlutik oqartussat inissiaataat tassani pineqarput. Qaasuitsup Kommuniata aamma Kommune Kujalliup najugaqarfiit naatsorsuutaat suli akuerisimanngilaat taamaammat naatsorsuutigineqarpoq 1. februar 2014-mi kommunini taakunani akit qaffaataat atuutilerumaartoq.
A/S Inissiaatileqatigiit Inip ilanngullugu nassuiarpaa akissaatikinnerit boligsikring aqqutigalugu kommunimi ikiorserneqarsinnaasut.