Tuesday, November 7, 2017 - 11:19

Inissiinerit Kommune Kujalliup missingersuutaanut ilungersortitsisoq

Assi.: Privatfoto
Kommune Kujalleq ilaatigut Sermitsiaq.AG-p alagaatinik takunnikkumanerata kingorna aningaasarliulersimaneq nassuerutigaa

Ukioq manna Kommune Kujallermi ulloq unnuarlu angerlarsimaffinnut inissiinerni aningaasartuutit amerlanerungaatsialersimapput.

Tamanna borgmester Kiista P. Isaksenip tusagassiuutinut nalunaarutaani nutaami allassimavoq.

- Pingaartumik meeqqanut inuusuttunullu ulloq unnuarlu angerlarsimaffinnut aningaasartuutit qaffariangaatsiarsimapput, aningaasaliissutinut sanilliullugu naatsorsuutigineqarluni 13 mio. koruunit tungaanut qaangiisoqassasoq, tamannalu isumaqarpoq aningaasaliissutinik 65%-mik qaangiisoqassasoq, tusagassiuutinut nalunaarummi allassimavoq.

Aningaasaqarnermut ataatsimiititaliaq aggustip qaammataani missingersuummi atuivallaartoqarsimanera pillugu paasitinneqarpoq, kommunimilu sipaarniartoqangaatsialerluni.

- Ingerlaannaq ... kommunip ingerlatsivii tamaasa, innuttaasunik kiffartuussineq ajorseriaateqartinngikkaluarlugu sutigut sipaarniarsinnaanersut misisissuisitsitsivugut, borgmesterip tusagassiuutinut nalunaarutaani allassimavoq.

Tusagassiuutinut nalunaaruteqarnermut qisuariaatit ilagaat, Sermitsiaq.AG-p aningaasaqarnermut ataatsimiititaliap aggustip qaammataani missingisersuutip qanoq inissisimanera pillugu allakkanik takunnissinnaatitaanermik akuersissumik qinnuteqarnerata kingorna.

- Naak massa missingersuut Kommunalbestyrelsip inaarutaasumik suli aalajangersaaffiginngikkaluaraa taamaammallu piffissap imaalinerani suliassaqarfiit ataasiakkaat pulaterfigiuminaakkaluartut, kommunip aningaasatigut killiffia paasisaqarfigiumallugu nunatsinni tusagassiorfinnit sulianik takunnissinnaatitaanermik noqqaassutit arlaqartut innersuussutigalugit matumuuna ukioq manna kommunip aningaasatigut ingerlatsinera pillugu paasissutissanik saqqummiussissallunga aalajangerpunga, borgmesteri allappoq.

Kisianni 2017-imut naatsorsuut qanoq inerneqassanersoq ukiunilu tulliuttuni missingersuutit qanoq isikkoqarumaarneri pillugit tutsuigunartumik allassimasoqanngilaq.

- Taamaakkaluartoq isumalluarpunga, isumaqarluinnarpungalu 2018-mut missingersuummi inaarutaasumi politikkikkut anguniakkat siunissamut sammisut aningaasaliiffiginissaannut inissaqartitsilluarumaartugut, borgmesteri allappoq.

Oktobarip ulluisa 26-nni Sermitsiaq.AG allagaatinik takunissinnaatitaanermut akuersissut qinnutigaa. Ulluni qulini piffissaliunneqartoq kommunip angumerisinnaanagu ippassaq, nalunaarutigaa.

- Kommune Kujallermi aningaasaqarnerup inissisimaneranut takussutissaq pillugu allagaatinik takunnissinnaanermut qinnuteqarnerit pillugu utoqqatsissutigalugu nalunaarutigissavarput, kommunip 2018-imut missingersuut, kommunalbestyrelsip ataatsimiileruni oqaluuserisassaa, qanoq isikkoqarnissaata pillugu ulapineq pissutigalugu, piffissaliunneqartoq angumerisinnaanagu nalunaarutigissavarput, nalunaarutigisinnaavarpulli sapaatip-akunnerini aggersuni akissutisinissat pillugu sulisoqarmat, kommuni mailikkut Sermitsiaq.AG-mut allappoq.

Seneste nyheder / Nutaarsiassat kingulliit