ajunaarfiusumik ikuallannerup kingorna
Inissiat arfineq pingasut ikuallannermit eqqorneqarput
Nuummi Blok 15-mi najugaqartut arlallit illoqarfimmi allamut inissikkallarneqarput inissiarisaat putsumik ajoqusersimammata
Nuummi Qapiarfiusaami sisamanngornermi Blok 15-mi inissiaq ikuallattoq kisimi ajoqusinngilaq. Inissiani arfineq pingasuni najugaqartut utaqqiisaa inissianut Sømandshjemmimullu inissinneqarput ISSmi eqqiaasartunit inissiaasa salinneqarneranni.
A/S Inissiaatileqatigiiffik Ini Blok 15-mi najugaqartunik tallimanngornermi ataatsimiisitsimmat paasinarsoq inissiat arfineq pingasunik saleqqissaarsimatinnagit najugarineqarsinnaanngikkallartut.
- Inissiani sisamani najugaqartut utaqqiisaasumik inissiani inissinneqarput najugaqartullu allat sisamat Sømandshjemmimut inissinneqarlutik. Naatsorsuutigaarput najugaqartut ataasinngorpat inigisaminnut utersinnaajumaartut, A/S Inissiaatileqatigiiffik Ini-mi attaveqarnermut pisortaq Else Løvstrøm Sermitsiaq.AG-mut oqarpoq.
Blok 15-mili najugaqartut ilaat ataatsimiinnermi najuutinngillat. Taamaattoq allakkanut nakkartitsiviisigut paasissutissanik agguuassiffigineqarput ikiorneqarnissamik pisariaqartitsissagunik saaffiginnissinnaasut ilisimatinneqarlutik.
Ikuallannermut suna pissutaanersoq suli paasineqanngilaq.