Siorarsiorfik
Inissianik suliniutip Storbæltimi ikaartarfissuit 30-40 ataatsikkut sanaartorneqarnerat assigaa
Siorarsiorfik-suliniut sanaartorneqassaguni assigaa Danmarkimi Storebæltimi ikaartarfissuit 30-40-t ataatsikkut suliarineqarnerat, pisortat-namminersortullu suleqatigiinneranni professori oqarpoq, taassuma Kalaallit Nunaat mianersoqquaa piffissami taama sivisutigisumi inukkaminik akiitsoqaqqunagu.
OPP-mik suleqatigiinnermi professorip, Ole Helby Petersen ernumassutigaa Siorarsiorfik-suliniut pillugu nunamut ukiuni amerlasoorpassuarni akiligassaqartitsinissaa. Taassuma tupigusuutigaa aningaasat taamak amerlatigisut atorniarneqarniarmata nunap tunisaata ataatsimut nalingat (BNP) eqqarsaatigalugu.
Piviusorsiorpa?
- Kalaallit Nunaanni suliniummik taamak angitigisumik aallartitsinissaq ilumut piviusorsiortuuva? Kalaallit Nunaannut aningaasanik taamak amerlatigisunik atorniartitserusuttut sunik soqutigisaqaramik, aamma ingerlatsinissamut ikiuukkusuttut eqqarsaatigalugit paarlattuanik kalaallit akileraartartut naggataatigut qanoq akiliissappat, aamma kommunimut namminersorlutik oqartussanullu suliassaq qanoq angitigaa?
Aamma atuaruk: Kim Kielsen: Nuuk ineriartorsinnaavoq - akisussaaffeqartumik
- Uanga isinni suliniut angisoorujussuuvoq Kalaallit Nunaata nunatut tunisaata ataatsimut nalinga (BNP) eqqarsaatigalugu. Tusakkakka naapertorlugit suliniut pineqartoq suli piariivissutut taaneqarsinnaanngilluinnarpoq. Piviusunngortinneqarsinnaanera nalorninartorujussuartut oqaatigineqarsinnaavoq aamma minnerunngitsumik pissutigalugu, inuiaqatigiittut taamaattumik piviusunngortitsinissaq ilumut silatusaarnerunersoq eqqarsaatigisariaqarami. Aamma isumaqanngilanga suliniummik taamak angitigisumik ingerlatsisoqarsinnaasoq namminersorlutik oqartussanik peqataatitsigani. Københavnimi metromik sanaartorneq qiviaraanni, kommunit marluk akornanni isumaqatigiissuteqartoqarsimavoq; sanaartorneq pillugu København aamma Frederiksberg kiisalu naalagaaffik isumaqatigiissuteqarlutik. Aningaasasnut tunngasunik sanilliussissagaanni metro 20-30 milliarder koruunit missaannik akeqarpoq, taanna Danmarkip nunatut tunisaata ataatsimut nalingat (BNP) eqqarsaatigalugu 2000 milliarder koruuninut inissinneqarsinnaalluni. Nuummi OPP-mik suliniut 5 milliardinik nalilik sanaartorniarneqarpoq, aamma Kalaallit Nunaanni nunap tunisaata ataatsimut nalingat (BNP) 14 milliarder koruuniuvoq. Tassa suliniut pineqartoq ima angissuseqarpoq Kalaallit Nunaata aningaasaqarnera tamarmiusoq ajutoortissinnaallugu, inugaq qaangerlugu akiligassaqalissagami.
Aamma atuaruk: Kielsen Nuummi suliniut pillugu: Isumaannakkut pilersaarut
Ole Helby Petersenip aningaasaliinissaq allatut paasinarsarpaa:
Storbæltimi ikaartarfissuit 30-40 ataatsikkut
- Danmarkimut pissutsinut tutsikkaanni taava Siorarsiorfik-suliniut sanaartorneqassaguni assigaa Storebæltimi ikaartarfissuit 30-40-t ataatsikkut suliarineqarnerat. Allatullu oqaatigalugu suliniut taanna Danmarkimi imaluunniit Europami assissaqanngilaq. Taamaattumik politikkerinit eqqarsaatigeqqissaarneqartariaqarpoq kalaallit akileraartartut sinnerlugit ajunaarutaarujussuarsinnaasumut akisussaaqataassanerlutik, Ole Helby Petersen oqarpoq.
Aamma atuaruk: Illoqarfiup immikkortua nutaaq sullorsuarmik Nuummut atassuteqassaaq