Nuuk

Inissianik Iseritimi attartortut qaffaavigineqassanngillat

Nuummi aserfallatsaaliinissaq pillugu isumaqatigiissutit akikinnerusut kingunerisaannik ineqarnermut akiliutit aappaagu nikisinneqassanngillat

Kommuneqarfik Sermersuumi Nuummi, Nuussuarmi, Qinngutsinni, Kapisilinni Qeqertarsuatsiaanilu inissiani 1.300-ni inissiaatileqatigiiffimmit Iserit A/S-imit aqutarineqartuni ineqartut aappaagumut ineqarnermut akiliutinik missingersuusiorsinnaanngorput.

Inissiaatileqatigiiffik sapaatip-akunnerani kingullermi nutaarsiassamik nuannersumik saqqummiussaqarpoq: Qaffaasoqassanngilaq, 2014-imi ineqarnermut akiliutit agguaqatigiissillugu 2,6 procentimik qaffanneqarsimasut.

Inissiaatileqatigiiffimmit ineqarnermut akiliutit uninngatiinnarneqarsinnaalerput illuutinik aserfallatsaaliuinermut atatillugu isumaqatigiissutit pisarnermit akikinnerusut pissarsiarineqarnissaat iluatsissinnaasimammat.

– Assersuutigalugu qalipaanermik suliassat suliariumannittussarsiuukkaangatsigik akinik nalin- ginnaasumik takusartakkatsinnit appasinnerusunik pissarsisalersimavugut. Inuiaqatigiinni aningaasarliortoqarpoq. Tamanna assassorissanik suliffeqarfiit suliassaaleqisut aamma malugaat. Tamannalu neqerooruteqaraangata akit appasinnerusalernerisigut aamma takutinneqarpoq, pisortaq Torben Kortegaard Iserit A/S-imeersoq oqarpoq.

Allaaserineqartoq Nuuk Ugeavisimi tamaat atuarneqarsinnaavoq. Aviisi akeqanngitsumik ataani aaneqarsinnaavoq aamma:

Powered by Labrador CMS