Inissianik attartortut naapertuuttumik pineqarumapput
Inissianik attartortut peqatigiiffiat IPK politikerinit erngup, innaallagissap kiassarnerullu akitsorneqarnissaannik kalerrisaarutaat qisuariarfigaat
- Namminersorlutik Oqartussat inissiaataannik attartorlutik najugaqartut, kiassarnermut, imermut, innaallagissamullu naapertuilluartumik akiligassinneqarumapput. Aamma akiligassat saniatigut akiligassiisarnerit siusinnerusukkut ilisimatitsissutigineqartarnissaat piumasarineqarpoq.
Taama allappoq inissianik attartortut nuna tamakkerlugu peqatigiiffianni siulittaasoq Marius Dalager.
Taamaattumik Ineqarnermut Naalakkersuisup Sermitsiami kingullermi ilimasaaruteqarnera, Nukissiorfiit Innallaallagissamut, imermut, kiassarnermullu akigititaasa misissuiffigineqarnissaannik suliniuteqarniarnera IPK-mit sakkortuumik taperserneqarpoq.
Namminersorlutik Oqartussat Inissiaataanni najugaqartut, kiassarnermut, imermut, innaallagissamullu akiligasseqqinneqarnermikkut eqqorneqartussaanerat pinaveersaarneqassappat, akiligassat naqqaniit suliarineqarlutik misissorneqartariaqarput, Marius Dalager tunngavilersuivoq.
Akit misissorneqarnissaat tapersersorneqartoq
IPK-p siulittaasuata nuannaarutigaa Mette Lyngep sulissutigiumamagu Nukissiorfiit imermut, kiassarnermut innaallagissamullu akigititai.
- Ineqarnermut naalakkersuisumit nalunaarut taanna IPK-mit sakkortuumik tapersersorneqarpoq, Marius Dalager oqarpoq.
- Tassami attartortut akiliutigisartagaat ukiuni kingullerni qaffasinneruleriartuinnarput, akiligassiissutillu naapertuilluartumik suliarineqarneq ajorput, imaammat attartortut kiassarnermut, imermullu atuinermut uuttuuteqartinneqanngimmata. Taamaattumik IPK isumaqarpoq akiligassiisarnerit attartortunut naapertuilluarnerusumik siunissami akiligassiissutigineqartalissasut, imaaginnartariaqanngimmammi attartortut piginnittut akiligassaat ilanngullugit suut tamaasa akilersussagaat, Marius Dalager tusagassiivinnut allappoq.
- Taamaattumik Namminersorlutik Oqartussat inissiaataanni najugaqartut kaammattorpagut, naapertuilluarnerusumik ikiorserneqartarnissartik pingaartikkunikku kattuffimmut ilaasortanngoqqullugit.
Sapaatip-akunnerani Sermitsiaq saqqummersoq pisiariuk "Atuisunut innaallagissap, erngup kisassarnerullu akingi qaffasinnerit" atuarlugu, uani pisiarisinnaavat: