Inissiaatileqatigiiffiik annertuumik iluarsartuussinialertoq

Nuummi inissiat Qapiarfiusaamiittut aneerasaartarfii iluarsartuunneqartariaqarput.

Tamanna pissutigalugu inissiaatileqatigiiffik INI qaammatip juunip naalernerani aneerasaartarfiit iluarsartuullugit aallartissaaq.
Aneerasaartarfiit iluarsartuunneqarnissaat sivisuumik ingerlanneqassaaq tassami 2019-imi oktobarip tungaanut iluarsartuunneqassagamik. Pilersaarutit malillugit blok 12 aammalu 13 ukioq manna suliarineqassapput. Ukiup tulliani blok 15 16 aammalu 17 iluarsaanneqassallutik, blok 11 aamma 14-imi aneerasaartarfiit iluarsartuunneqassapput 2019-imi, inissiaatileqatigiiffik taama paasissutissiivoq.

- Iluarsartuussinerup nalaani aneerasaartarfiit matoorneqartassapput, ajornartorsiulernermili qimaaffittut atorneqarsinnaassallutik, INI tusagassiuutinut nalunaarummi taama allappoq.

Iluarsartuussinissaq pillugu najugaqartut ilisimatinneqareerput. Iluarsaattuussinerit aallartinneqaleraangata INI A/S-imi sulisut najugaqartut angerlarsimaffiinut ornigullutik aamma ilisimatitsiartortarniarput, najugaqartut tamakkiisumik annertunerpaamillu ilisimasaqarnissaat taamaaliornermikkut qulakkeerniaramikku. Kingusinnerulaartukkut attartortut ataatsikkut paasissutissiiffigineqassapput, tassanittaaq sukumiinerusumik paasissutissiinerit ingerlanneqassallutik.