Inisseeqqinnissamut 70 million koruunit

Nuugaatsiami Illorsuarnilu innuttaasut qimangussorneqarsimasut angerlasimaffeqaleqqinnissaat piviusunngulerpoq.

Ineqarnermut Naalakkersuisoq, Erik Jensen (S) innuttaasunut inisseeqqinnissamut atorneqartussat 70 million koruunit immikkoortippai.

- Aningaasat inissianik ataavartussanik katiteriaannarnik sanaartornermut, sumiiffimmi inissianik namminerisamik pigineqartunik pisiniarnermut aammalu inissianik pioreersunik, Namminersorlutik Oqartussanit imaluunniit Qaasuitsup Kommunianit pigineqartunik iluarsaassinermut atorneqassapput, Namminersorlutik Oqartussat tusagassiuutinut nalunaarummi allapput.

Inuit sumut nuukkusullutik kissaatigisaat aallaavigineqassapput. Tamanna Qaasuitsup Kommuniata paasinialeruttorpaa. Najugarfissatulli ilaatigut toqqarneqarsinnaapput Uummannaq nunaqarfiilu, Upernavik, Aasiaat, Qeqertarsuaq imaluunniit Qasigiannguit.

- Nuannaarutigeqaara Naalakkersuisut Inatsisartut kiisalu kommunit qanimut suleqatigiilluarnerisigut, innuttaasut Nuugatsiami Illorsuarnilu tassaarsuaqarnerani eqqugaasimasut toqqissisimasumik inuuneqalernissaannut namminnerlu illoqaqqilernissaannut, piaartumik sanaartornissaannut aningaasaliinissat piviusunngormata, Ineqarnermut Naalakkersuisoq, Erik Jensen (S) oqarpoq.

Aningaasat Namminersorlutik Oqartussat sanaartugaannit, atuinikinneruffiullutik naammassineqartunit nuunneqassapput, tassanilu aamma kommunit aningaasanik, 2016-imi aamma 2017-imi Nunaqarfinnut Isorliunerusunullu Inissialiortiternermut Pilersaarummut immikkoortinneqartunik atorneqanngitsunik tapiissuteqassapput.

Innuttaasulli illunik sanaqataaffiusunik namminerlu illulianik, suli Namminersorlutik Oqartussanut akiitsoqarfiusunik pigisaqarpata akiitsoqarunnaarsinneqassapput.