Inip siulittaasua: Ini Nuummut nuulinngilaq

Inip ataani atorfiit marluk inuttassarsiorneqarmata, tassalu Inip pisortaatut kiisalu atorfilittanut aqutsisoq, Qeqqata Kommuniani borgmesterimut, Siumumeersumut Hermann Berthelsenimut, paatsuungatitsilerput Ini Nuummut nuunniarneqarnersoq.

- Atorfiit taakku marluk Sisimiuniikkunnaarlutik Nuummut nuunniarneqarput, Hermann Berthelsen pingasunngornerup ullaap tungaani taama oqarpoq.

Imalu nangippoq:

- Tamannali naammanngilaq. Allagarsiussaq naapertorlugu uppernarsaatilimmik suliffeqarfimmik allannguisimaneq imaluunniit ‘ingerlatsivimmik nalimmassagaasumik allannguinermut suleqataasimaneq’ pisortaanissamut piumasaqaatigineqarpoq.

Atuaruk: Borgmesterip Inip Nuummut nuunneqarnissaa eqqumiigivaa

Siulittaasup nuuttoqalinnginnerarpaa
Kisianni Inip siulersuisuini siulittaasup, Jette Larsenip, Inip qullersaqarfiata Sisimiuniit Nuummut nuunneqalinnginnerarpaa.

- Pilersaaruteqartoqanngilaq Inip qullersaqarfiata nuunneqarnissaa. Akerlianilli Inimi aqutsineq nukittorsarniarparput. Pisortap kiisalu atorfilittanut aqutsisup Nuummi najugaqarnissaanut tunngaviuvoq suliassat annertunerpaartaat Nuummiimmata, Jette Larsen Sermitsiaq.AG-mut oqarpoq.

Jette Larsenip aamma ilanngullugu oqaatigaa atorfilittanut aqutsisoq siornatigut Sisimiuni najugaqarsimanngimmat, maannalu Nuummi atorfioreersoq tassunga inatsilerituutut tunuliaqutaqartumut taarsiunneqartoq.

- Inip tamanna aamma pisariaqartippaa, Jette Larsen oqarpoq.

Allanngorsaaneq ingerlavoq
Kisianni pisortassarsiornissinni allappusi ‘uppernarsaatilimmik suliffeqarfimmik allannguisimaneq imaluunniit ‘ingerlatsivimmik nalimmassagaasumik allannguinermut suleqataasimaneq’ pisortaanissamut piumasaqaatigineqarpoq’. Inip qullersaqarfia nuunneqarnialerpa?

- Taanna paatsoorneqarsinnaavoq. Uani isumagivarput pisortap Inimi allannguisinnaaneq piareersimaffigissavaa, taamaalilluni ingerlatseqatigiiffik ullumikkut tulluarsarneqarsinnaaniassammat, Jette Larsen oqarpoq.

Imalu nangippoq:

- Ini pitsanngorsassavarput isigineqarneralu allanngortillugu, taamaalilluni Ini pitsaanerusumik isigineqarsinnaalersissassallugu attartortunit piginnittunillu. Allanngorsaanerput ingerlapparput, ilaatigullu sullissinermut atorfiit pingasut Sisimiuni qullersaqarfimmi pilerseqqammerpagut.