ataatsimeersuarneq
Ini nutaamik siulersuisuni siulittaasortaartoq
Inissiaatileqatigiiffiup ataatsimeersuarnerani Mads Barlach Christensen siulersuisuni siulittaasunngorpoq
Ataasinngormat INI A/S ataatsimeersuarpoq.
Ingerlatseqatigiiffik 2,5 mio koruuninit sinneqartoorutigai, angusarli siulersuisunit iluarisimaarneqarpoq.
Siulittaasoq nutaaq
Siulersuisut ilaasortanik nutaanik marlunnik ilaneqassasut ingerlatseqatigiiffiup piginnittui, Namminersorlutik Oqartussat aalajangerput.
Mads Barlach Christensen, Air Greenlandimi sulisoqarnermut pisortaasoq isertinneqarpoq siulersuisunullu siulittaasutut toqqarneqarluni. Line Frederiksen, Tele Greenlandimi naatsorsuusiornermut pisortaasoq ilaasortanngorpoq.
Carsten Pietras siulersuisunit tunuarpoq, Karin Bing Orkland aamma Kristian May siulersuisuni ilasortaasutut ingerlaannarput. Kristian May siulersuisunit siulittaasup tulliatut toqqarneqarpoq. Siulersuisuni ilaasortaasut sulisunit qinigaasut, Michael R. Petersen aamma ArnâraK Z. Lennert ingerlaannartut, tusagassiuutinut nalunaarummi paasissutissiarineqarpoq.
- INI A/S-ip periusissiorneq 2015-imi aallartinneqartoq ingerlatileruttorpaa. Periusissiatut suliniutit aqutsissussinermik ingerlatseqatigiffik naammassisaqarsinnaanerusoq inerneraat. Ingerlatseqatigiiffiup suli siunertaraa, inuiaqatigiinnut iluaqutaasumik suliffeqarfik naammassinnissinnaanerusoq sullisserusussuseqarnerusorlu periusissiami anguniagaasut malersussallugit, inissiaatileqatigiiffiup pisortaanera Henrik Rafn, tusagassiuutinut nalunaarummi allappoq.