INI eqqunngitsumik iliuuseqarpoq
– Kiassarnermut akiligassap akilerniarnera naassaanngilaq. Taamatut oqarpoq SIK-p siulittaasua Jess G. Berthelsen. – INI-p inatsisini paragrafi qitiusumik inissisimasoq qaangiinnarpaa
Inissianik attartortitsineq pillugu Inatsisartut peqqussutaanni nr. 2-mi, 12. maj 2005-imeersumi paragraf 45-mi ersarissumik allassimavoq namminersorlutik oqartussat kommunillu inissiaataannik attartortittakkanik attartortitsisup isumagissagaa illu inissiallu attartortinneqartut illersorneqarsinnaasumik aserfallatsaalineqassasut.
Taamatut tusagassiorfinnut nalunaarutikkut allappoq Jess G. Berthelsen, tassuuna erseqqissaatigalugu kiassarnermut akiligassat akilerniarnerat naassaanngitsuusoq. Ilaatigut pissutigalugu INI-p paragrafi siuliani taaneqartoq malinngimmagu. Assersuutigalugu taavai inissianut ataasiakkaanut kiassarnermut uuttortaateqannginnera, matut igalaallu suertut. Tamakkunatigut INI-p inatsit malissimanngilaa.
– Pisortanut piginnittunut tamanna maalaarutigeqattaarlugulu isornartorsiortarpara, atuisuminnullu iliuuseqarnerat kamaatigaara. Tassami sooq piginnittut ingerlatsisullu inatsimmi allassimareersut malinngilaat? Paragrafimi tassani 45-mi, immikkoortoq 2-mi ersarissumik ilaatigut allassimavoq ´kuuffinnut, kiassarnermut, innaallagissamut, gas-imut imermullu teknikkikkut atortut ikkussorneqarsimasut ajunngitsumik atorsinnaasumillu pitsaassuseqassasut´, Jess G. Berthelsen allappoq, eqaamavaalu Siumup qineqqusaarutigisimammagu nunami tamarmi attartortut immikkut suliniuteqarfiginiarlugit:
– Iliuuseqarnissamut piffissanngorpoq, Jess G. Berthelsen oqarpoq, ujartorpaalu ineqarnermut akiliutip ilaa procenti qanoq annertutigisoq aserfallatsaaliinermut ikkussukkanullu nutaanut aningaasaliinermut atorneqartarnersoq.