Inatsisartut
Ingerlatsivinnut akileraarutit Naalakkersuisut appartinniarpaat?
Ingerlatseqatigiiffiit akileraarutaat apparneqassanersoq, Inatsisartunut ilaasortaq Bendt B. Kristiansen Inuit Ataqatigiinneersoq Naalakkersuisunut allagaqarluni apeqquteqarpoq.
- Naalakkersuisut siunertaqarpat selskabsskatip appaavigineqarnissaanik?
Inatsisartunut ilaasortaq Bendt B. Kristiansen ilaatigut Naalakkersuisunut taama apeqquteqarpoq.
Tamatuma saniatigut ingerlatseqatigiiffinnut akileraarutip 31,8 procentimit 20 procentimit appartippagu, ukiuni 20-ni tulliuttuni nunap karsianut qanoq akeqassanersoq akissutiserusuppaa.
- Ukiuni aggersuni nunatta karsiani isertittarumaagassat annikillingaluttuinnarumaarnerat aningaasaqarnermut siunnersuisooqatigiit siulittuutigiuarpaat, illuatungaani aningaasartuutaasarumaartussaq qaffakkaluttuinnarumaartut. Taamaammat selskabsskati appaavigineqassagaluarpat nunatta karsianut qanoq naleqassanersoq paaserusupparput, apeqquteqaatini tunngavilerpaa.
Inuit Ataqatigiit ingerlatsiviit akileraarutaasa apparneqarnissaat akerleralugu, taassuma naqissuserpaa.