Akileraarut
Ingerlatseqatigiiffinnut akileraarut qaffasissoq apparnreqassanngilaq
Suliffeqarfiit ingerlatseqatigiiffinnut akileraarutip apparneqarnissaa sinnattoriinnarsinnaavaat, akileraarut ullumikkut 31,8 procentiuvoq europamilu akileraarutip agguaqatigiisinnerani 10 procentimik qaffasinnerulluni.
Taamaasillutik Naalakkersuisut nunat allat assigalugit ingerlatseqatigiiffinnut akileraarummik appaanianngillat. 2017-imi Europami nunat akornanni aggguaqatigiisillugu 21,9 procentiusimavoq, tassa qallunaat nunaanni ingerlatseqatigiiffinnut akileraarummut 22 procentiusumut qaninnerpaalluni.
Én af flere muligheder
Aningaasaqarnermut Akileraartarnermullu Naalakkersuisoq Aqqaluaq B. Egedep, Bendt B. Kristiansenimut akissuteqaataani, ingerlatseqatigiiffinnut akileraarut oqallisiginerarpaa.
- Ingerlatseqatigiiffinnut akileraarutip appartinneqarnissaa tunngavissanut sunneeqataasinnaasut arlallit ilagaat aammalu iliuusissatut periarfissatut naalakkersuisooqatigiinnissamik isumaqatigiissummi eqqaaneqarluni, Aqqaluaq B. Egede paasissutissiivoq.
- Pissutsit allat, soorlu attaveqaatit, ilinniagaqassutsip qaffasissusia suliffissallu tassaapput aamma pingaaruteqarluinnartut. Pisortat aningaasaataat atorlugit aningaasaliisoqaraangat ataatsimut aningaasaliinerup taamaattut sapinngisamik
annertunerpaamik iluanaarutigineqarnissaa pingaaruteqarpoq. Taamaattumillu suliffeqarfiit atugassarititatigut qanoq pitsaanerpaamik tunngavissinneqarsinnaanersut sukumiisumik misissorneqassaaq, Aningaasaqarnermut Akileraartarnermullu Naalakkersuisoq oqarpoq.
Attaveqaqatigiinneq ilinniartitaarnerlu salliutinneqartut
- Tamanna Naalakkersuisunit ingerlaavartumik nalilersorneqaqqissaartarpoq aammalu attaveqarnikkut pitsanngorsaanissanit
ilinniagaqassutsillu qaffassarneqarnissaanit ingerlatseqatigiiffinnut akileraarutip appartinneqarnissaa Naalakkersuisunit maanna pingaartinneqannginnerulluni, paasissutissiarineqarpoq.
Ingerlatseqatigiiffinnut akileraarut Europami nunat agguaqatigiisillugu akileraarutaannut apparneqaraluarpat tamanna nunap karsianut 90 million koruunit missaanni annaasaqaatigissavaa.
Aqqaluaq B. Egedep nassuerutigaa ingerlatseqatigiiffinnut akileraarutip appartinneqarneratigut inuiaqatigiinnut iluaqutaasumik suliffeqarfiit aningaasaliinerulernissaat. Illuatungaanilu tikkuarpaa, suliffeqarfiit sinneqartoorutiminnik piginnittunut tunniussinissaq toqqarpassuk akileraarutip annikillissutaa akileraarutitigut iluanaarutinut tamarmiusunut sunniuteqassanngilaq iluanaarutinut akileraarut allanngortinneqassanngimmat.
Kukkunersiuisut: Ingerlatseqatigiiffinnut akileraarut qaffanneqarli
Grønlands Revisionskontor tusarniuummut akissuteqaammini Naalakkersuisoq pappilissanut nalilinnut iluanaarutit akileraarummik inatsisiliuunneqaratik ingerlatseqatigiiffinnut akileraarutip qaffaanissaa siunnersuutigisimavaat.
- Ingerlatseqatigiiffinnillu akileraarutip qaffanneqarnissaa Naalakkersuisut siunnersuutigilersaanngilaat, Aqqaluaq B. Egede allappoq.