aatsitassat
Ingerlatseqatigiiffik Isuani piginneqataasoq akiliisinnaajunnaartoq
Kinamiut ingerlateqatigiiffiannut General Nice Groupimut piginneqataasoq akiliisinaajunnaartutut nalunaarutigineqarpoq. General Nice Groupip Isuani saviminissamik piiaaffissamut akuersissummik piginnittuuvoq, taassumalu Kangilinnguit pisiareriarnikuuaa
General Nice Groupip piginneqataaffigisaa Hong Koongimi eqqartuussivimmit uneqqullugu peqquneqarpoq. Bloggertartaroq Jichang Lulu taama allappoq.
Ingerlatseqatigiiffik General Nice Resources (Hong Kong) Ltd Australiamiunit akiligassaqarfiusunit arlaninnit akiliisinnaajunnaartutut nalunaarutigineqarpoq.
Naak Hong Kongimeersut General Nice Group Nunatsinni tamanut ammasumik saqqumilaanngikkaluarluni, ingerlateqatigiiffik nunami takornartaanngilaq.
London Miningimit akuersissummik pisisoq
Januaarimi 2015-imi General Nice Groupip piiaanissamut akuersissut London Mining Greenlandimit akilersuiunnaaqqasumit pisiaraa. Tamanna iluanaarutaasumik pisiarineqarnerarpoq.
Tamanna ingerlatseqatigiiffik piginneqataasoq, General Nice Development (Hong Kong), Jerseymi nalunaarsorneqarsimasoq aqqutigalugu pisiarineqarpoq.
Taamanili suliniut aallarteqqinneqanngilaq.
Atuaruk: Kinamiut London Mining Greenland pigilerpaat
Kangilinnguit pisiareriaraat
Sapaatip akunneri arlarlialunnguit matuma siorna ateq General Nice Group Nunatsinni saqqummeqqippoq. Ingerlatseqatigiiffiup upernaaq Kangilinnguit illersornissamut ministeriaqarfimmit pisiariniarsarinerata kingorna, tamanna pivoq.
Atuaruk: Kinamiut Kangilinnguit pisiariumagaluarpaat
Pisinissamut misiliineq, nittartakkakkut nutaarsiassaqartitsivik naapertorlugu, illersornissaqarfik maanna Kangilinnguaniileqqinnissamik kinguneqartitsivoq.
General Nice Groupip Kangilinnguit sumut atorniarsimaneraat suli erseqqissarneqanngilaq.
Aningaasaqarnikkut ajornartorsiorneq
Isuata pisiarinerani nalunaarutigineqarpoq, General Nice Group aningaasaateqarferujussuarmi tukattumik ingerlasoq.
2015-imi januaarimi AG-p oqaluttuaraa, Namminerorlutik Oqartussat naapertorlugit General Nice Group 63 milliardit koruuninik naleqartoq, ukiunilu kingullernilu ukiumut 113 milliardit koruuninik kaaviaartitaqartoq
Tamanna tunuliaqutigalugu Namminersorlutik Oqartussat piiaaffiup ineriartortinnissaanut pitsaasumik periarfissaqarput.
Ingerlatseqatigiiffik 100-nit ikinnerunngitsunik nunarsuup annerpaani inissisimasuni ingerlatseqatigiiffinnik piginneqataaffeqarpoq.
Atuaruk: Pisortatigoortoq: London Miningip Isuani pilersaarusiaa naleeruppoq
Bloggertartoq Jichang Lulu General Nice Groupip aningaasaqarneranut tunngasumik allaanermik oqaluttuarpoq. Ingerlatseqatigiiffik piginneqataaffigineqartoq akiliisinaajunnaarsinneqartoq General Nice Ressources (Hong Kong) siornali akiligassaqarfimmit allamit akiliisinnaajunnaartutut piumaffigineqarsimagaluarpoq.
Suliffeqarfissuullu siulersuisuini siulittaasoq, Cai Suixin, Jichang naapertorlugu aningaasaateqarfinnit aggeqquneqartarsimavoq, taakkunanit aningaasarsiassaqarlutik isumaqarnertik pissutigalugu.
Suliffeqarfik aamarsuarnik aamma sisannik niueruteqartarpoq, aamarsuarnullu tunngasoq ukiorpaalunni ingerlanerliorsimagunarpoq. Isuanik akuersissummik pisineq tamatumunngarpiaq tunngassuteqarsinnaasoq, Jichang Lulup siornatigut nalilernikuuaa.
Ingerlatseqatigiiffik aningaasaqarnikkut tatisimaneqartilluni, isertitaqarnissamut periarfissamik takutitsinissamut pisariaqartitsisimasinnaavoq.
Atuaruk: Danmarkip Kalaallit Nunaat qarsupiinnarlugu aalangiuteqartoq
Tamatuma saniatigut Isuata nalinga aamma Kangilinnguanik pisiniaraluarneq Kinami oqartussanut aamma naalagaaffimmit Kinamit suliffeqarfinnik pigineqartunut attaveqarneq pitsanngortinniarneranut tunngassuteqarsinnaavoq.