Skip to main content

Inerniliineq: Appat perlerlutik toqusimapput

2018-imi januarip qaammataani appat toqungasut toraarneqarsimasut perlerlutik toqusimapput. Tamanna misissuinermi inerniliunneqarpoq.

Nunatta kujaterpiaani ukiortaarsimalaaginnartoq 2018 appanik toquinnarsimasunik tusarsaasoqalerpoq, taakkulu perlerlutik toqusimasut paasineqarpoq. Tamanna Danmarkimi inuussutissalerinermik ilisimatusafiup DTU Veterinærinstituttip, Danmarks Tekniske Universitetip ataaniittup, Pinngortitaleriffiullu misissuinerannit erserpoq.

Pinngortitaleriffik tusagassiuutinut nalunaarummi taama allappoq.

Pinngortitaleriffik naapertorlugu piniartut  appanik toquinnarsimasunik sumiiffinnit assigiinngitsuniit ilisimatusarfeqarfinnit pineqartunit katersitinneqarput, taamaalillunilu appat katillugit 20-t misissuiffigineqarlutik. Appat misissorneqartut saluttuararsuupput, ukiumilu oqimaassuserikkajutaminnit 40 procentimik oqinneralutik.

- Appat misissorneqartut ilaat pingasut timmissat nualluutaannik nappaateqartut paasineqarpoq, kisiannili taanna sakkortuumik tuniluuttuunngilaq. Timmissat nualluutaat nassaarineqartoq timmissani nujuartani nalinnginnaasumik timimiorineqartarsimavoq, taamaammallu timmissanik perulutsitsisarani, Uumasut nakorsaanerunerat Sanne Eline Wennerberg, nunatsinni Uumasunut Nakorsaqarfik Inuussutissalerinermullu Oqartussaaffimmeersoq, oqarpoq.

Pinngortitaleriffik naapertorlugu appanik  toquinnarsimasunik siumuisimasut siulliit tutsiuttut 3. januar 2018-imeerput qavannga Aappilattumiit Narsaq Kujallermiillu nalunaaruteqartoqarmat, sapaatillu akunnerini tulliini Paamiuni Nuummilu aamma appanik toquinnarsimasunik siumuisoqartarsimalluni.

- Nunatta kujataani appat toquinnartartut sionatigut aamma naammattoorneqartarsimapput, tassa 2004-mi 2014-imilu. Taakkunani pisuni marlunni misissuisarsimanerit takutippaat appat perlerlutik aamma toqusarsimasut. Imaassorinalerpoq appat ukiisarfimminni silapiluttarneranik aamma/imaluunniit nerisassaalatsinerminnik  peqquteqartumik akuttunngitsunik toqorartarsimassasut, Pinngortitaleriffimmi Seniorforsker Flemming Ravn Merkel nassuiaavoq.

Appat toquinnartartut amerlanerit  arnaviaasartut 

Nunatta kitaani kujataata avataani appat Svalbardimeersut, Islandimeersut aammalu nunatsinneersut ukiisarfigaat, nunallu aggerfigisaat tamarmik apppanik piaqqisartoqassutsimikkut annertuumik kinguariaaateqarsimapput.

- Appaqarfinni taasatsinni appat ikiliartupiloornerat ukiisarfimminni ilaatigooriarluni toquinnartartorpassuarnit qanoq sunnersimatigineqarnerat ilisimasaqarfiginngilarput, taamaattarnerallu appaqassutsimut soorunalimi ikiliartuutaaqataavoq”, Flemming Ravn Merkel nassuiaavoq, nangillunilu:

- Paasisarput alla tassaavoq appat toquinnartartut amerlanerusut arnaviaasarmata, tamannalu appaqassutsip kinguariartupiloorneranut suli ajornerusumik kinguneqarsinnaavoq.

Nunatsinni Uumasunut Nakorsaqarfik Inuussutissalerinermullu Oqartussaqarfimmiit Pinngortitaleriffimmiillu timmissanik toquinnarsimasunik naammattuuisoqarnerani piaartumik ilisimatitsisoqartarnissaa kissaatigineqarpoq.

Ilanngullugu ilisimatitsissutigineqarpoq timmissat toquinnarsimasut passutilinniginnerini oqartussat attavigineqassasut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER