akitsuutit

Inerartorneq ilorraap tungaanut sangutinneqassaaq

Umiarsuarnut takornariartaatinut ilaasunut akitsuutip allanngortinneqarnerata akuersissutigineqarneratigut nutaamillu ataatsimut takornariaqarnermut inatsiseqalernikkut Kalaallit Nunaat kajungernarnerulersinneqassaaq

Vittus Qujaukitsoq
Vittus Qujaukitsoq naapertorlugu umiarsuarnut takornariartaatinut akitsuutip appartinneqarnera takornariaqarnermi periusissatut iliuusissatut pilersaarutip ilagaa.

– Kalaallit Nunaata unammillersinnaassusia nukittorsartariaqarparput ukiuni kingullerni umiarsuarnut takornariartaatinut ilaasut ikiliartornerat illua'tungilerniarlugu, Inuussutissarsiornermut, Sulisartoqarnermut Niuernermullu Naalakkersuisoq Vittus Qujaukitsoq tusagassiorfinnut nalunaarutikkut allappoq, umiarsuarnut takornariartaatinut ilaasunut akitsuutip islandisut angitigilersillugu appartinneqarnissaa qanittukkut Inatsisartut 12-it isumaqataallutik 9-all akerliullutik akuersissutigereeraallu.

Tamatumunnga tunuliaqutaavoq ukiuni kingullerni umiarsuarnut takornariartaatinut ilaasut ikileriarujussuarnerat. 2010-miit 2013-imut 25 procenti sinnerlugu ikileriarsimapput.

Tamanna sioqqullugu - pingaartumik 2007-2009-mi Nunat Tamalaani Issittup Ukiuata nalaani - umiarsuarnik takornariartaatinik Nunatsinnut takornariat amerliartorsimapput. Ineriartornerup pitsaasup kingunerisaanik oqartussaasut ilaasunut akitsuutit qaffappaat, taamaasillunilu umiarsuaatileqatigiiffiit Nunatsinni takornariartitsisarneranni iluanaarutaannik amerlanerusunik arsaartalerlugit. Kingorna umiarsuit takornariartaatit tikittartut ikiliartulerput.

Akitsuummi nutaami qitiusumik tunngaviuvoq takornariartaatinik umiarsuaatileqatigiiffiit ilaasut amerlassusaat malillugu akiliisarunnaassammata, umiarsualivimmulli akitsuuteqartinneqartalissallutik umiarsuup oqimaassusaa naapertorlugu.

IA aamma Partii Naleraq siunnersuummut akerliullutik taasipput. IA-p piumanerugaluarpaa akitsuutip appartinneqarnerata ilaa timmisartuussinermut atorneqassasoq.

Vittut Qujaukitsoq naapertorlugu akitsuutip appartinneqarnera takornariaqarnermut iliuutsimut annertunerusumut iliuusissatut pilersaarutip ilagaa, taannalu ukioq manna kingusinnerusukkut saqqummiunneqarumaarpoq.

Tamanna peqatigalugu takornariaqarnermut akuersissummut inatsit aamma aliikkutaralugu qissattarnermut akuersissuteqarnermut inatsit kattunneqarput, taamaasilluni qinnuteqartunut sullissineq ajornannginnerulissalluni.

– Takornariaqarnermut akuersissutit nunataasa saqqummiunneqarnerat takornariaqarnerup ineriartortinneqarneranut aningaasaliisunik pilerinnilersitsinissamut pingaarutilittut isigaara. Pissusissamisoorpoq aningaasaliisut aningaasaliissutitik pitsaanerpaamik qulakkeerumammatigit, Vittut Qujaukitsoq oqarpoq, ilaaatigut qissattariaqarluni takornariaqarnerup nukittorsarneqarnera innersuussutigalugu.

Kommunit kommunimut pilersaarummi nunamerit saqqummiutissavaat suliarinnittussarsiuunneqarsinnaasut. Islandimi kapisilinnik qissattarneq takornariaqarnermi ingerlatsiffiulersimavoq iluanaarnarluartoq. Nunatsinni takornarianik taamaattunik samminnittoqaereerpoq, Islandili qiviallattaaraanni tamanna takornariaqarnermi immikkut ineriartortinneqarsinnaavoq.

Powered by Labrador CMS