saarullinniarneq
Ineqi K.: Aalisagaq tamaat Kujataani atorluarneqartariaqarpoq
Siumumit Inatsisartunut ilaasortaq, Ineqi Kielsen, Nunatta kujataani saarullinniarnermi tulaassisussaatitaaneq Naalakkersuisunit qanoq nakkutigineqarnersoq paaserusuppaa. Taanna isumaqarpoq, aalisakkanik suliareqqiisarnissaq nunatsinni atuutsinneqartariaqartoq
Inatsisartuni ilaasortap Ineqi Kielsenip, Naalakkersuisunit paaserusuppaa kujataani saarullinniarnermi tulaassisussaatitaaneq qanoq nakkutigineqarnersoq, kissaatigalugulu aalisakkap atorluarneqarnissaa.
- Ulluni makkunani kilisaatit saarullinniutit Narsamut tulallattaapput. Taakkuna-nnga takussaapput saarulliit niaquiinnariarlugit qeriteqqinneqartartut.
Siumumeersup Ineqi Kielsenip paragraf 37 naapertorlugu Naalakkersuisunut apeqquteqarnermini tunngavilersuutaa taama aallartippoq. Taannalu isumaqarpoq, suliffissaaleqineq annikillisinniarlugu aalisagaq atorluarneqartariaqartoq.
Atulernissaa kissaatigigaa
- Naalakkersuisut aalisakkamik naleqarnerulersitsinissaq anguniarlugu siunniussaat eqqarsaatigalugu suliareqqiisarnissaq atuutsinneqartariaqarpoq, minnerunngitsumik Kommune Kujallermi nunatsinni suliffissaaleqifiunerpaat ilaanni suliffissaaleqinerup akiornissaa pisariaqarpoq, Ineqi Kielsenip paragraf 37-mik apeqquteqarnerminik tunngavilersuivoq.
Taanna isumaqarpoq, illoqarfimmi Narsami suliffissaaleqisut amerlavallaartut inuttussusaanut sanilliukkaanni. Assersuutigaalu agguaqatigiisillugu ukiuni pingasuni kingullerni Narsami 169-it ukiup taamaalinerani suliffissaaleqisartut.
- Illoqarfik taama inuttunngitsigisoq taama amerlatigisunik suliffissaaleqisoqarfiu-soq, suliffissaaleqisunik ikilisaaffigineqassappat aalisakkat tulaanneqartut sulia-reqqillugit ilutigitillugu nalittorsarlugit tunisassiarineqarnissaat tassaavoq sulif-fisaaleqinermik akiuiniarnermi aqqutissaq sukkanerpaaq oqinnerpaarlu, Inatsisartunut ilaasortaq Ineqi Kielsen isumaqarpoq.