Ineqarnermut akinik qaffaasoqassanngilaq

Naak Kommuneqarfik Sermersooq aningaasaqarnikkut ajornartorsioraluartoq kommunip inissiaatileqatigiiffia pitsaasumik angusaqarpoq. Iserit A/S-ip aningaasaqarnera pitsaasumik ingerlanneqarpoq.

Sinneqartoorutissatut 76.000,-nit missingersuutaasimagaluartut ukiup affaani siullermi Iserit A/S kr. 585.000,-nik sinneqartooruteqartoq inissiaatileqatigiiffik tusagassiutinut nalunaarpoq. Tamatumunnga atatillugu inuiaqatigiinni akit akiliutillu allanngoriartoraluartut inissianut attartortitanut allaffissornermut akiliutit inissiamut attartortittakkamut ataatsimut inissiaatileqatigiiffik 2006-imi aallaartimmalli allannguuteqartinneqanngitsut ukiumut kr. 4.536,-iusut attatiinnarneqassasut inissiaatileqatigiiffimmi aalajangiusimaneqarpoq. Ineqarnermullu akiliutit qaffaaffiginnginnissaannut tamanna pingaaruteqarpoq.

Tamanna sulisut suliatigut ineriartortittuarnerisigut, suleriaatsini pisariillisaaneq taammatullu aningaasartuutinik pingaartitsilluni aqutsinermik qitiutitsinikkut anguneqarpoq.

Allaffissornikkut akiliutigitittakkat allannguuteqannginnerisa aamma tamanna 2015-imi ineqarnermut akiliutit allannguuteqartinneqannginnissaannik sunniuteqartoqassasoq nalunaarutigineqarepoq.

- Taamaammat naliginnaasumik inissiat kikkunnit tamanit inigineqarsinnaasut neqeroorutiginissaat pillugu inuiaqatigiinnit kissaatigineqartoq pingaaruteqartoq naapertorlugu naammassinnissimalluta Iserit A/S-imi isumaqarpugut.

Inissianik attartortittakkanik siunissami aserfallatsaaliuinissanik pilersaarutit naapertorlugit ataa- vartumik aserfallatsaaliuisarnissaq, kiisalu aserfallatsaaliuisarnernut missingersuutit atorluarneqarnerulernerinik kinguneqartoq tamatumuuna aamma tunngaviuvoq, tamannalu ungasinnerusoq isigalugu pitsaanerpaamik aserfallatsaaliuisoqarnissaq kinguneqartitsissallunilu aningaasartuutitigut annikillisitsisussaalluni.

Taamatuttaaq periusissatut pilersaarutit qanittukkut suliarineqartut akuerineqartullu siulersuisut ataatsimiinnerini oqaluuserineqarput, tassungalu ilanngullugu Iserit A/S-ip ineriartoqqinnissaa sammineqarluni. Najugaqartut oqartussaaqataanerisa annertusarneqarnissaat attartortullu ilimagisaasa takussutissaliornissaat periusissami pingaartillugit anguniarneqarput.