inissiat
Ineqarneq pillugu Maalaaruteqartarfik ilaasortaqanngitsoq
Ineqarneq pillugu Maalaaruteqartarfik massakkuugallartoq ilaasortaqanngilaq, Naalakkersuisullu qaqugorpiaq ilaasortanik nutaanik toqqaassanersoq ilisimaneqanngikkallarpoq.
Ineqarneq pillugu Maalaaruteqartarfik ukioq manna maajip 31-aniilli ilaasortaqarsimanngilaq. Tamatumunnga pissutaasoq tassaavoq maalaaruteqartarfiup ilaasortaasa toqqagaaffii ukiunik sisamanik sivisussuseqartut qaangiussimammata. Ineqarnermut naalakkersuisoqarfimmi immikkoortortami pisortaq, Embla Kristjánsdóttir, ugeaviisimut ilisimatitsivoq ilaasortassanik toqqaaniarnermi suliaq suliarineqartoq.
Tamanut Nuuk Ugeavis taama allappoq.
Ilaasortassaanik toqqaaniarneq ajornakusoortoq
- Taassuma nassuiaatissartaraa maalaaruteqartarfiup ilaasortassaanik toqqaaniarneq assigiinngitsunik pissuteqartumik ajornakusoorsimasoq, sulinerli ingerlasoq. Suliarlu oktobarip qeqqata missaani naammassineqarnissaa pisortap neriuutigaa, kingornalu maalaaruteqartarfimmut ilaasortassat toqqarneqarsinnaassasut oqaatigalugu, Embla Kristjánsdóttir, ugeaviisimut mailikkut nassuiaavoq.
Maalaaruteqartarfimmut maalaaruteqarsimallutik inerniliisoqarnissaannik utaqqisut suliallu uninngasut qassiunersut Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiup allaaserisap allanneqarnerata nalaani akinikuunngilaat.
Allaaserisaq tamaat Tamanut Nuuk Ugeavisimi atuaruk, aviisi sapaatip-akunneranut saqqummersartoq akeqanngitsoq uani ataani linki aqqutigalugu aasinnaavat: