Inatsit nutaaq: Suliffeqarfiit siunnersuisartut periarfissarsiortut

Suliniutinut angisuunut inatsit naatsorsuutigineqareersutut Folketingimi akuerineqarpoq. Nunanit allamiut najugaqarsinnaanerat sulisinnaanerallu taamaasilluni akuerineqarluni.

Tamanna suliffeqarfinnut siunnersuisartunut periarfissanititsisoq Licitationen - Byggeriets Dagblad allappoq.

Ingeniørinut siunnersuisartut peqatigiiffiata (FRI) siulittaasuata Henrik Garverip oqaluttuaraa, peqatigiiffimmit suliniutinut angisuunut inatsip naammassineqarnissaa pissanngatigalugu malinnaaffigineqarsimasoq.

- Suliassanik suli aallartittoqavinngilaq, aamma naatsorsuutigissavarput aatsaat kingusinnerusukkut tamanna aallartikkumaartoq. Aningaasaliisoqarumalissaarli, taakkulu siunnersorneqarnissamik pisariaqartitsissapput, Licitationen – Byggeriets Dagbladimut oqarpoq.

Rambøll Grønlandimi pisortap Henrik Fenger Jeppesenip oqaatigaa suliniutinut angisuunut inatsit malunnaateqarpallaanngitsoq.

- Maaneereertuuvugut, taamaammat allannguuteqartoqarujussuanngilaq. Sulissutigut suliniutinut angisuunut inatsip allanngortippallanngilaat, neriuutigaarpulli angallannikkut sanaartugassanik aallartitsiortorumaassasoq, Licitationen – Byggeriets Dagbladimut oqarpoq.

Inatsit sukaterneqartoq
Namminersorneq eqqunneqarmalli suliniutinut angisuunut inatsit 2012-mi pilersinneqarmat inatsisiliarineqarsimasuni pingaarnersaajusoq oqaatigineqartarpoq.

Aleqa Hammond Naalakkersuisut siulittaasunngorami inatsit sukateqqinnikuuaa.

Allamiut suliartortussat pisinnaatitaaffii pillugit inatsit erseqqissaassutigineqareerpoq, inatsillu Inatsisartuni isumaqatigiiffiulluni taasissutigineqarluni.