soraarnerussutisiat
Inatsit nutaaq: Soraarnerussutisiaqalernissamut ileqqaartussaatitaaneq
Kikkulluunniit ukiumut 100.000 koruunit sinnerlugit aningaasarsiaqartut siunissami soraarnerussutisiaqalernissamut aaqqissuussinermut akiliisalissapput. Tamanna inuiaqatigiinnut inunnullu ataasiakkaanut isumatusaarneruvoq, kikkut tamarmik siunissamik ungasinnerusumik eqqarsaatiginninnissamut assigiimmik pikkorissuusanngimmata, soraarnerussutisiassanut aaqqissuussinernik immikkut ilisimasalik oqarpoq.
Innuttaasut ukioqatigiiaanut agguataarsimanerat erseqqissumik takussutissiivoq.
Nunarput utoqqaat ukiuni aggersuni amerleriarujussuarnerannik nalaataqassaaq. Tamanna assersuutigalugu utoqqaat illuinut utoqqalinersianullu aningaasartuutit amerleriarnerannik kinguneqassaaq. Inatsisartut tamanna tunngavigalugu pinngitsoornani soraarnerussutisiaqalernissamut ileqqaagaqalernissaq pilllugu inatsimmik, ukiut nikinneranni atuutileqqammersumik, akuersissutiginnipput.
. Inatsimmik innuttaasut ataasiakkaat atuinissamut periarfissaannnik inuunerullu ingerlanerani akileraarutinik akiliutigisartagaannik naligiissaarinniartussamik, taamaaliornikkullu siunissami soraarnerussutisiaqalersussat inuuniarnermi atugarisaannik pitsanngoriartitsisussamik, Sermitsiaq aviisi tallimanngormat allappoq.
Inatsisip nutaap kinguneranik kikkulluunniit 18-inik ukioqalereersimasut Kalaallit Nunaannilu tamakkiisumik akileraartussaatitaasut soraarnerussutisialittut ukioqalernissartik tikillugu soraarnerussutisiaqalernissamut ileqqaakkanut akiliisalissapput
Kalaallit Nunaata soraarnerussutisiaqalernissamut pinngitsoornani ileqqaartussaatitaanermik atuutilersitsisoqartarneranut ilanngunnera isumatusaarnerusoq, soraarnerussutisiaqalernissamut ileqqaagaqartitsisoqartarneranik immikkut ilisimasalik, professor Michael Møller, Copenhagen Business Schoolimeersoq, isumaqarpoq.
– Inuk isumatusaartoq inuunermini atuinissaminik pilersaarusiorumassaaq, tassa ukiuni ingerlalluarfiusuni ukiunut ingerlalluarfiunngitsunut soraarninngornissamullu ileqqaagaqarluni. Inuilli tamarmik pilersaarusiullaqqissuunngimmmata inuit qanittuinnarmut eqqarsartarnermut illersorniarlugit pinngitsoornani ileqqaagaqartitsinissaq isumatusaarneruvoq, Michael Møller Sermitsiamut oqarpoq.
Allaaserisaq Sermitsiaq aviisimi kingullermi saqqummertumi tamakkerlugu atuaruk. Aviisi uani pisiariuk: