Skip to main content

Inatsit assortuussutaasoq ukiormanna oqallisaanerpaasoq ullumi suliarineqassaaq

Aalisarnermut inatsisissatut siunnersuummik inuiaqatigiinni pisuussutit amerlanerusunut Naalakkersuisut siammarterniarpaat. Maanna pisassiissutinik pigisaqartut inatsisinut nutaanut ukiuni qulini naleqqussartinneqassapput.

Aalisarnermut inatsisip oqaluuserineqarneratut maanna ataatsimiiffiusumi inatsisit allat taama annertutigisumik oqallisaagunanngillat. Imigassamut inatsit kisimi tassunga qaninnerugunarpoq.

Pisuussutit uumassusillit siammarterniaraat
Tamanna aalisarnermut piniarnermut naalakkersuisup Karl Kristian Krusep (S) aamma maluginiarpaa.

- Siunnersuut pillugu oqallinnerujussuup takutippaa siunnersuut Kalaallit Nunaanni aalisarnermut inuiaqatigiinnullumi pingaaruteqartorujussuusoq, Kalaallit Nunaannilu aalisarnermut suut pingaaruteqarnerpaanersut assigiinngitsunik isumaqarfigineqartoq, taanna ullumi saqqummiussinermi oqalugiaatissamini allappoq.

Aalisarnermik inuussutissarsiuteqartut aasaaneraniilli siunnersuummut sakkortuumik isornartorsiulerput. Sulisitsisut, SIK aamma KNAPK ataatsimooelutik siunnersuutip inuiaqatigiinnut akisunissaat oqariartuutigaat. Aningaasaqarnermut naalakkersuisoqarfimmit aamma akisunaarneqarsinnaanera aarlerisaarutigineqarluni.

Karl Kristian Krusep (S) isornartorsiortoqaraluartoq anguniakkani attatiinnarpaa.

- Atugassarisanik piginnittuunerup inunnut amerlanerusunut siammaannissaa Naalakkersuisut siunnersuutikkut peqataaffiginiarpaat, taamaaliornermikkut inuiaqatigiit pisuussutaasa inunnut ikittuinnarnut eqiterunnissaat akiorniarlugu, taanna allappoq.

Pisassiissutit agguarneqarnerat
Krusep siunnersuut kalaallit 'pisassiissutaatillit kunngiinik' atorunnaarsitsiniarnertut isigaa. Ingerlatseqatigiiffiit allat aqqutigalugit pisassiissutinik toqqaannanngitsumik piginneqataanissaq ilaatigut periarfissaasimavoq.

- Naalakkersuisut isumaqarput taamatut ineriartorneq pissusissamisuunngitsoq, akuusut ikittuinnaat pisassat ilaannut annertuunut nakkutiginnilernerannik kinguneqarsimammat. Pisassiissutit ilaat inunnut ikittuinnarnut eqiterutilersimapput.

Aalisarnermik inuussutissarsiuteqartut pisassiissutit pissarsiatik imaluunniit akiliillutik pissarsiatik pigiinnarnissaannut tatiginnillutik aningaasaliissuteqarsimanertik tunngavilersuutigaat.

Tamanna tunngavigalugu umiarsuaatileqatigiiffissuarnit taarsigassarsinissamut suliaqartoqarnissaanik aarlerinartoqarpoq. Aalisarnermut piniarnermullu naalakkersuisoqarfiup ilisimasalinnik naliliititsinerani Copenhagem Economics taama naliliinikuuvoq.

Ukiuni qulini nikikkiartornissaq
Maanna pisassiissutaateqartut piffissanut nutaanut naleqqussarnissamut piffissaqartinneqarnissaat Karl Kristian Krusep maluginiaqquaa.

- Taamaattumik siunnersuut aalajangersakkamik imaqarpoq, taanna malillugu akuusut attuumassuteqartut maleruagassanut nutaanut naleqqussarnissamut ukiunik 10-nik piffissalerneqarput. Tamanna isumaqarpoq siunnersuut ukiunik 10-nik ikaarsaariarfissartaqartoq, taanna allappoq.

- Pissutsinik immikkut ittunik pilersoqartoq paasinarsippat, tamatumani akuusut ataasiakkaat maleruagassanut nutaanut ukiut 10 qaangiutsinnagit nalinginnaanngitsumik annertuumik annaasaqaratik imminnut tulluarsarsinnaanatik, pisuni taamatut immikkut ittuni immikkut ittumik akuersissuteqarnissamut siunnersuut periarfissaqartitsivoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER