inatsisiliorneq

Inatsit assortuussutaasoq Inatsisartunit kinguartinneqassasoq kommunit neriuutigaat

Inatsisartut ukiaanerani ataatsimiinnerminni inatsisissatut siunnersuut oqaluuserissavaat, taanna kommunini meeqqanut sulianut Namminersorlutik Oqartussanut oqartussaaffeqalersitsissaaq

Kommunit isumaginninnermut ilaqutariinnermullu ataatsimiititaliaat aalajangiisuussagaluarunik, Inatsisartut inatsisissatut siunnersuutip assortuussutaasup suliarineqarnissaa kinguartinneqassagaluarpoq, taanna Namminersorlutik Oqartussanut kommunip meeqqanut inuusuttunullu tunngatillugu suliaannut ilanngussinnaalersitsissaaq.

Atuaruk: Meeqqanut suliassani kusanaatsuliortoqarnissaa inatsisip nutaap pinngitsoortissavaa

Ajornartoorfimmi unikaallatsitsineq
Isumaginninnermut naalakkersuisoq, Martha Lund Olsen (S) siunnersuuteqartuuvoq, taassuma assersuutigalugu meeqqanik sumiginnaasoqartillugu sulianut oqartussat akuliussinnaanerat qulakkiissavaa.

Kommunillu suliaq kivissinnaanngippagu, Namminersorlutik Oqartussat aqutsinermut tigusisinnaanngussapput.

Tamakkununnga tunngasunik nalunaarusianik isornartorsiuisunik arlalinnik saqqummertoqareersorlu Naalakkersuisut iliuuseqarput.

Atuaruk: Isornartorsiuineq: Siumup siunnersuutaa Dansk Folkepartimut eqqaanartoq

Piffissaq naammanngitsoq
Kommunit illuanik aarlerisaarutiginikuuaat, siunnersuut kommunit nammineersinnaanerannut sakkortuumik kalluaasoq. Kommunit maanna aamma isumaginninnermut ilaqutariinnermullu ataatsimiititaliaasa aarlerisaarutigaat, inatsisissatut siunnersuut annertoorujussuaq pillugu akissuteqarfiginissaanut piffissakippallaarsimallutik.

- Unikallalluta nassuerutigisariaqarparput, inatsisissatut siunnersuut annertoorujussuaq taassumalu ilassutitai aamma annertoorujussuit pillugit akissuteqarnissatsinnut naammaginartumik suliarinissaannut piffissaliussaq sivikippallaarujussuarpoq.

- Aarleqqutigaarput meeqqanik ikiorsiisarneq pillugu inatsisitigut sinaakkusersuinissami siunertat pitsaagaluaqisut, siunnersuummi pineqartumi Inatsisartunullu saqqummiunniarneqartumi naammassineqarsinnaanavianngitsut, taamaammallu maanna mianersoqqusivugut, kommunit ataatsimiititaliaanni siulittaasut ataatsimut ammasumik allagaqaatiminni allapput.

Kigaallatsitsigitsi
- Sakkortuumik kaammattuutigaarput Naalakkersuisut Namminersorlutillu Oqartussat suliamut tunngatillugu kigaallassasut, ilanngullugu taakku oqarput.

Atsiortut sisamat ukuupput: Karla Egede Bisgaard (S), Kommune Kujalleq, Poul Hansen (D), Kommuneqarfik Sermersooq, Alfred Olsen (S), Qeqqata Kommunia kiisalu Kristian Jeremiassen (S), Qaasuitsup Kommunia.

Atuaruk: Meeqqat pillugit siunnersuut MIO-mit tapersersorneqarpoq

Powered by Labrador CMS