inatsisitigut ataataqanngitsut

Inatsisitigut ataataqanngitsut pisinnaatitaaffii pillugit ataatsimiisitsisoqassaaq

Inatsisitigut ataataqanngitsut inatsisitigut pisinnaatitaaffii pillugit ataatsimiisitsinissamut Naalakkersuisut innuttaasunik aggersaapput

Inatsisitigut ataataqanngitsut pillugit nutaamik inatsiseqalernera pissutigalugu pineqartut ilisimatinneqartariaqartut Sara Olsvig isumaqarpoq

Inatsisitigut ataataqanngitsunik taaneqartarput inuit katissimanerup avataatigut, Kalaallit Nunaata Kitaani ukioq 1963 sioqqullugu aamma Tunumi ukioq 1974 sioqqullugu inun­ngorsimasut, ataatamillu kinaassusersinissaanik inatsisitigut manna tikillugu periarfissa­qarsimanngitsut.

Naalakkersuisut inatsisitigut ataataqanngitsut pillugit ataatsimiisitsinissamut maanna qaaqqusipput.

Ataataassuseq kingornussisinnaatitaanerlu pillugit maleruagassat nu­taat ukioq 2014-imi atortuulersinneqarput, taamaalillutillu inatsisitigut ataataqanngitsut ataatamik kinaassusersinissaanik pisinnaatitaaffeqalerput, kingornusseqataasinnaan­ngorlutik (ataataasoq toqukkut qimagussimanngippat) imaluunniit ataatamik kinguliaanik kinguliaqalersinnaanngorlutik.

Ilaqutariinnermut, Naligiissitaanermut Inatsinillu Atuutsitsinermut Naalakkersuisoq Sara Olsvig ataatsimiisitsinissamut ima oqaaseqarpoq:

- Inatsisitigut ataataqanngitsut inatsisitigut pisinnaatitaaffimminnik ilisimatinneqarnissaat Naalakkersuisut pingaartippaat. Inatsisip nutaap atortuulersinneqarnerata kingorna unammilligassaasimasut erseqqissumik suussusersinissaat aammattaaq pingaaruteqar­poq. Taammaammat sammisamik taama pingaaruteqartigisumik oqaluuserisaqarnissaq siunertaralugu ataatsimiisitsinissanut, Social – og Indenrigsministereqarfik peqatigalugu innuttaasunik aggersaasinnaagama nuannaarutigaara. Innuttaasut pisinnaatitaaffitik pil­lugit isumaasa, iliuusissanillu allanik pisariaqartinneqartunik oqariartuutissaasa tusarnis­saat qilanaaraara.

Nunatsinni in­nuttaasut amerlaqisut pisortanit inatsisitigut eqqunngitsumik pineqarsimanerat aaqqiis­suteqarfigineqartariaqartoq isumaqarpoq.

Innuttaasunik ataatsimiisitsinerit pissapput:

  • Nuummi, ulloq 24. januar nal. 19.00 – 21.00, Sermersuup Eqqartuussiviani, aamma
  • Ilulissani, ulloq 2. februar nal. 19.00 – 21.00, Kulturhus Sermermiut

Ataatassarsiuussinerup qanoq ingerlanneqartarnera, suliassallu suliarineqarnissaata qa­noq ingerlanissaa innuttaasut innuttaasunik ataatsimiisitsinermi paasisaqarfigiumaar­paat.

Powered by Labrador CMS