Inatsisitigut ataataqanngitsut pillugit inatsit naammassitinnagu kinguartinneqartoq
Sara Olsvig, Inuit Ataqatigiit, ullumi Folketingip Kalaallit Nunaanut tunngasunut ataatsimiititaliaani inatsisitigut ataatanngitsut inatsisissaat ataatsimiissutigereerlugu isumalluarpoq
Folketingip Kalaallit Nunaanut tunngasunut ataatsimiititaliaani ullumi pingasunngornermi ataatsimiinnerani ilaatigut inatsisitigut ataataqanngitsut pillugit inatsisissaq ataatsimiinnermi eqqartorneqartut ilagaat. Ataatsimiititaliami ilaasortat tamarmik isumaqatigiipput Inatsisartut allannguutissatut siunnersuutaata kinguneratut inatsisip naammassinissaa ukiortaareerpat suliarineqarumaartoq.
- Iluarisimaarpara inatsisissap suliarineqarnissaa kinguartinniarlugu aalajangiisimagatta. Pingaaruteqarluinnarpoq Inatsisartut allannguutissatut siunnersuutaat inatsimmut akuerisassatsinnut ilanngutissagatsigu, tassa inatsisitigut ataataqanngitsut ataataminnik toqusoorsimasut kingornussartaanillu naammassillugit suliarinnittoqareersimasunik taarsiivigineqarnissaannik piumasaqaat itigartiviinnarnagu maanna sulissutigissavarput qanoq ililluta allannguutissamut siunnersuut piviusunngortissinnaanerlugu, Sara Olsvig oqarpoq.
Sara Olsvig inatsisissamut siunnersuutip Inatsisartuni Folketingimilu saqqummiunneqarsimasup nutaamik assigiinngisitsinertallip allanngortinnissaa pimoorullugu sulissutigisimavaa. Siusinnerusukkut qallunaat naalakkersuisuinit akissutisinikuuvoq, naalakkersuisut akuersaarsimagaat inatsisitigut ataataqanngitsut inatsisitigut inissisimanerat ataataminnik toqusoorsimasut kingornussartaanillu naammassillugit suliarinnittoqareersimasunik, taamaalillunilu inatsisitigut ataataqanngitsup kingornussassaqarsimaguni kingornussassaraluaminik annaasaqarsimasoq allaanerusumik inissisimasoq, ataataminnik toqukkut suli qimagaasimanngitsumut tassalu kingornussisussamut sanilliullugu.
Taamaattorli qallunaat naalakkersuisuisa Kalaallit Nunaat pillugu ataatsimiititaliamut akissuteqarnermini arlalinni erseqqissaatigisimavaa Inatsisartut allannguutissatut siunnersuutaat inatsisitigut ataataqanngitsut pillugit inatsissamut ilanngunneqarsinnaanngitsoq.
- Qallunaat naalakkersuisuisa taamak inerniliisimanerat isumaqatiginngilara, oqarpummi taarsiissuteqarsinnaaneq inatsimmit pisussaatitaaffiunngitsoq. Taamaammat nuannaarutigeqaara maanna ataatsimiititaliami allannguutissatut siunnersuut ilanngunnissaa sulissutigissagatsigu, naak naalakkersuisut taamak nalunaaraluartut, Sara Olsvig itisiliivoq.
Kuupik Kleist Folketingimut ilaasortaagallarami, aamma Sara Olsvig naalakkersuisutigut apeqqutinik arlariinnik apeqquteqartarsimapput inatsisitigut ataataqanngitsut pillugit inatsisiliornissap aallarnisarneqarnissaa siunertaralugu, tassalu maanna piviusunngorluni inatsisitigut ataataqanngitsut inatsisiliunneqartussanngorput.
Naatsorsuutigineqarpoq februar 2014-imi isumaliutissiissut saqqummiunneqarumaartoq, inatsillu inaarutaasumik akuerineqarumaartoq folketingimi ataatsimiinneq aasaq 2014-imi naammassitinnagu. Folketingip nittartakkakkut quppernerani piffissamut pilersaarut suli nutarterneqanngilaq.