akileraartarnermut inatsit

Inatsisissaq mittarfissat aningaasalersorneqarnissaannut qulakkeerinnittussaq

Naalakkersuisut tassaanngaannartumik pipallatamik oqaluuserineqarlunilu ullullu sisamat ingerlanerinnaani akuerineqartussamik inatsissatut siunnersuuteqarput.

Kommunerne får ingen skattepenge fra de medarbejdere, der kommer fra udlandet, og som ventes at skulle etablere de nye lufthavne.

Inatsimmi pineqarput soraarnerussutisianik akileraaruseriaaseq minnerunngitsumillu Ilulissani, Nuummi Qaqortumi nunatta avataaniit mittarfilioriartorlutik suliartortussarpassuit.

Milliard-projekt

Namminersorlutik oqartussat suliniut 3,6 milliard koruunit missaanni naleqassangatinneqartup aningaasalersorniarnera unammillernartoqartikkaa, ilisimaneqarluarpoq. Namminersorlutik Oqartussat 1,5 - 1,8 milliard koruuninik aningaasaliissuuteqarnissaa, sinneruttulli avataaniit atorniarnikkut akilersorneqarsinnaanerat, naatsorsuutigineqarpoq.

Nunallu karsia immikkut immerumallugu Naalakkersuisut nutaamik inatsimmik ilusilersuisimapput, tassanni avataaniit mittarfilioriartorlutik suliartortusssarpassuarnit akileraarutaannit isertitarineqartussat nunap karsianut tutsinneqartassapput.

Kommunit avaqqunneqartut

Akileraarutitigut isertitarineqartut naliginnaasumik kommuninut agguaanneqartaraluarput, Namminersorlutillu Oqartussat piumasaannik mittarfiliornissamut atatillugu taamatut agguaqatigiisitseriaaseq inatsimmi ajornartinneqarpoq.

- Sulisussat nunanit allaneersut taamatut inissisimasut maani nunatsinniinnerminni pisortanit sullississutit taamaallaat annikitsuinnarmik atortarpaat, soorlu ulluunerani paaqqinniffiit aamma meeqqat atuarfiat. Pisortanit sullississutit atorneqassappata, tassani peqqinnissaqarfiup sullissinera, nunap karsianit aningaasalersorneqartoq, pineqarajussaaq, Naalakkersuisut inatsisissatut siunnersuummut nassuiaateqarlutik allapput.

Utoqqalinersianut akitsuuterujussuaq

Soraarnerussutisianulli aningaasaateqarfiit akileraaruserneqarnerinut atatillugu PFA Soraarneq PFA Pensionimut tunniunneqarnerani soraarnerussutisianut annertoqqatigiit erseqqissaavigineqartussaapput.

Nassuiaatinilu allassimavoq, soraarnerussutisianut inatsimmi allannguutit akuerineqassappata, Namminersorlutik Oqartussat ataasiartumik akitsuut 200 - 400 million koruunit akornanni naleqartoq akilerneqarnissaa naatsorsuutigineqartoq.

Naalakkersuisut paasissutissiaraat, mittarfiliortussanut akileraarutip allanngortinneqarniarnera nunap karsiata qanoq amerlatigisunik iluanaarutigissaneraa naatsorsorneqarsinnaanngitsoq. Sanaartornissamut neqeroortitsineq qanoq isikkoqarumaarnera, tamatumunnga nassuiaatigineqarpoq.

Oqaluuserinnipallanneq

Inatsit ataasinngorpat siullermeerneqassaaq. Pingasunngornermilu aappassaaneerinninneq pissalluni, ukiaaneranilu ataatsimiinnermi tassa sisamanngornermi ulloq 16. november inatsip akuerineqarnissaa naatsorsuutigineqarpoq.

Siulittaasoqarfik maleruaqqusanut atuuttunut piffissaliunneqartartunulli immikkut akuersissuteqarsimavoq, taamaasilluni qulequtaq oqaluuserisassanut ilanngutsinneqarpoq.

Powered by Labrador CMS