Monday, March 20, 2017 - 07:53

Inatsisip nutaap akisuup ilisimasaqannginnermik ersersitsisoq

Inatsisit qimmit qitsuillu ersinnginnissaaanut anniannginnissaannullu illersuisussat ulluinnarni malinneqarsinnaanngillat, kommunimi ataatsimiititaliaq isumaqarpoq

Uumasut atugarissaarnerannut siunnersuut nutaaq naapertorlugu qimmit qitsuilluunniit toqunneqaleraangata politiinut qinnuteqarluni akuersissummik pisoqartalissaaq. Aammattaaq aallaasit aalajangersimasut atorneqarnissaat uumasullu toqungasut qanoq pineqarnissaannut malittarisassanik piumasaqaateqartoqarpoq.

Qeqqata Kommunianili politikerit naapertorlugit inatsisit ulluinnarni atukkanut tulluanngippallaarput, taammaattumillu malinneqarsinnaanatik.

Aamma atuaruk: Qamuteralannut malittarisassat nutaat kamaatigineqartut

Kommunip ataatsimiititaliaasa ilaasa inatsisit nutaat Namminersorlutik Oqartussaneersut pillugit oqallisigisimasaanni tamanna takuneqarsinnaavoq.

Ataatsimut isigissagaanni, sumiiffinni pissutsit ilisimaarinagit siunnersuut suliarineqarsimavoq, Qeqqata Kommuniani ataatsimiititaliami ilaasortat taama isornartorsiorput, taakku siunnersuut tusarniarsimavaat.

Suliassanut pingaarutilinnut piffissamik annaasaqassasut
Inatsisit piffissaqarfigineqartumit inuttassaqarnermillu annertunerusumik pappialarsornerulersitsissasut politikerit ilaatigut tikkuarpaat.

Aamma atuaruk: Nunatsinni umiarsualiviit ingerlanneqarneranni piffik nutaaq aallartilerpoq

- Qimminik nakkutilliisoq imaluunniit uumasut nakorsaat toqutsiniaraangami politiinut qinnuteqaqqaartarnissaanik piumsaqaat pingaartumik uparuarneqarpoq. Suliamut taama ittunut politiit immikkut piffissaqarnavianngitsut nalilerneqarpoq. Inunnut ataasiakkaanut tunngatillugu suliassanik annertuumik suliassaqartartut ilisimaneqarpoq, tusarniaanermut akissummi ataatsimiititap suliarisimasaani tamanna takuneqarsinnaavoq.

Sisimiuni qimminut nakkutilliisup ingammik qimminut toquisinermut inatsisit nutaat akuerineqassappata malikkuminaatsissagaa, ataatsimiititaliaq inerniliivoq.

Aallaat atoqqusaanngitsoq
Qimminik qitsunnillu ungoorilluni tigusaqartarnermut toqutsisarnermullu nalunaarutissatut siunnersuut malillugu aallaat aalajangersimasumik sakkortussusilik atorneqartalissaaq.

- Sisimiut illoqarfiani qaqqajunnaqarnera patsisaalluni, Sisimiuni qimminik nakkutilliisoq aallaasersortarnissaminut politiinit akuerineqarsimanngilaq. Taamaattoqassappat aallaagaluaruni patruuni allamut saaratarsinnaammat. Kaliberit sakkortuut atorneqartarnissaannik nalunaarutissatut siunnersuutitigut piumasaqaataavoq. Tamatumi aamma, politiit siunnersoqatigeqqaarnagit siunnersuut suliarineqarsimasoq paasinarsiinnarpoq, kommunimi politikerit oqaatigaat.

Aamma atuaruk: Pisanik nalunaaruteqartarnermut malittarisassat nutaat

Kina akuersissava?
Uumasut toqunneqarsimasut aamma sumut pineqartarnissaat Qeqqata Kommunianit isornartorsiorneqarpoq. Tassami ikuallaavinni akuerisani uumasut toqunikut ikuallanneqartarnissaanik piumsaqaateqartoqartoq atuarneqarsinnaavoq. Matumani ikuallaavik akuerisaq sunaanersoq, oqartussallu kikkut akuersisarnersut pillugit paasissutissat amigaatigineqartut, ataatsimiititaliap erseqqissaatigaa.

Seneste nyheder / Nutaarsiassat kingulliit