inatsisinik atortitsineq
Inatsisinut ministeri Sarap oqaloqatiginiaraa
Eqqartuussissuserisut Siunnersuisoqatigiit Kalaallit Nunaanni inatsisitigut isumannaatsuuneq pillugu nalunaarusiaat saqqummereersorlu Naalakkersuisut qisuariaateqalerput
Eqqartuussissuserisut Siunnersuisoqatigiit nalunaarusiaminni inatsisitigut isumannaatsitsinissamut siunnersuutit ataasinngormat saqqummersippaat.
- Isumakulunnartoqarteqaara suliassaqarfinni arlariinni unammilligassaqartoqarmat annertuunik suliarisassanik, tamatumani Eqqartuussissuserisut nalunaarusiaminni takussutissiineri, Ilaqutariinnut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq Sara Olsvig tusagassiuutinut nalunaarummi allappoq.
Atuaruk: Inatsisitigut isumannaassusermut soqutiginninneq annertooq
Inatsiseqarnermut ministeri oqaloqatiginiarpaa
Inatsisitigut isumannaatsitsinissamut siunnersuutigineqartut pillugit danskit ministeriat Søren Pape Poulsen (K) sapaatip akunnerata tulliani oqaloqatigissavaa.
- Namminersorneq pillugu isumaqatigiissummi Danmarki pisussaaffeqartoq danskit naalakkersuisuinut aamma eqqaasitsissutigissavara, tamatumani Danmarkimi atugassarititat assigalugit inissimalernissat qulakkeerneqarnissaat pisussaaffiuvoq.
Atuaruk: Eqqartuussissuserisut eqqartuussisoqarfiit misissoqqissaarpaat
Nalunaarusiaq isornartorsiorneqarpoq
Naluanaarusiaq pillugu Nuummi pingasunngormat oqallitsitsisoqarpoq. Nalunaarusiamulli isornartorsiuinerit assigiinngitsut oqallinnermi ersersinniarneqarput.
Eqqartuussiveqarrnerup ingerlariaasianut tunngaviit eqqunngitsut atorlugit naliliisoqartoq Nunatsinni eqqartuussisuuneq Søren Søndergård Hansen isumaqarpoq. Aaqqissuusseqqinnermi suli piviusunngortinneqanngitsoq inernileereernissaq taassuma tulluarsorinngilaa.
Atuaruk: Nunap eqqartuussisuunerata inatsisitigut isumannaassusermut nalunaarusiaq amigarnerarpaa
Illersuisut akuerisat siulittaasuata isornartorsiutigineqartut ilai aamma akerlilerpaa. Illersuisummi akuerisat unnerluussisuutitaasunut pitsaanngitsunik suleqateqannginnerarluni.
Kalaallit Nunaanni Pinerluttunik Isumaginnittut pisortaata Naaja Nathanielsenip nalunaarusiami allaanerusunik ujartuivoq.
Atuaruk: Eqqartuussiviit aalajangiisarneri kukkunertaqartut
Erseqqarinnerusunik piumasaqassaaq
Ajornartorsiutinillu aaqqiiffigisasassanik tigussaasoqartoq taakku tamarmik isumaqataapput.
- Taamaammallu Naalakkersuisuinit innersuussutigineqartut misissussavagut Kalaallit Nunaannullu tunngasuni suliniutissani piumasaqaatissat anguniagassallu ersarinnerusunik saqqummiutissallutigit, inatsisinik atuutsitsinermut naalakkersuisoq Sara Olsvig (IA) oqarpoq.
Atuaruk: Inatsisitigut siunnersuisarfik: Inatsisiliortarneq paasiuminaatsoq
Namminersorlutik oqartussat akisussaaffigaat
Namminersorlutik Oqartussat akisussaaffii aamma isigineqartariaqartut nunatsinni eqqartuussisuunerup Søren Søndergårdip eqqaasississutigaa. Pinerluttulerinermilu inatsisip inuusuttunut pineqaatissiissutit pillugit aalajangersagai kommunimiit naammassineqartussaanerarlugit.
Pinngitsaaliilluni atoqatiginninnertut ittuni eqqartuussisut pinerlineqartumut ikiuuttussamik ivertitsisussaapput eqqorneqartoq ikiorluarneruneqarniassammat. Kommunip inuit taakku ivertittussaavai. Tamakkunatigut pitsanngorsaasoqarluarsinnaavoq.
- Tamakkunatigut pitsanngorsaasoqarluarsinnaavoq, nalunaarusiamut oqaaseqaammi taama allappoq.