inatsisitigut isumannaatsuuneq
Inatsisinut atuutsitsinermi suli ajornartorsiuterpassuaqartoq
Danskit inatsiseqarnermut ministeriata Søren Pape Poulsenip inatsisinut atuutsitsinerup kivinneqarnissaanut sulinermi Kalaallit Nunaat peqataatinniarlugu neriorsuivoq
Ajornartorsiutit suli annertupput: Kommunefogedit amigaataasut, illersuisut aamma eqqartuussiviit kiisalu pineqaatissinneqarsimasunut inissiisarfiit tatisimaneqartut, innuttaasunut ilaalersitseqqinneq ajortoq, assersuutissat tamakku ilaminiinnaraat.
Tamanna ullumikkut Folketingimi tusarniaasoqarnerani naqissuserneqaqqipoq.
Danskit inatsiseqarnermut ministeriata Søren Pape Poulsenip (K) ajornartorsiuterpassuit iluarsisassat amerlasut miserratiginngilaa.
Tamatuma saniatigut suliat tamarmik ataatsikkut iluarsineqarsinnaanngitsut naqissuserpaa, kisianni tulleriiaarneqartariaqarnerarpai.
Tamannalu tulleriiaarineq danskit tungaannit kisimi suliarinianngilaa, kisianni Naalakkersuisut qanimut suleqatigalugit pissasoq oqaatigaa.
Tamanna suleqatigiinneq ingerlareerpoq. Isumaginninnermut inatsisinillu atuutsitsinermut naalakkersuisup Sara Olsvigip (IA), Søren Pape Poulsenimik (K) oqaloqatiginnereersimalluni oqaatigaa.
Kalaallit inatsisinut atuutsitsinermut tunngasuni kissaataannik salliutitsissamik suleqatigiissitamik pilersitsivoq.
Akisussaaffiup danskit assigilerlugit kivinneqarnissaat anguniagaasoq, Søren Pape Poulsenip (K) arlaleriarluni naqissuserpaa.
Kisianni saniatigut suli ungasittoq tusarniaanerup erseqqissarpaa.