Mittarfimmut suliniut

Inatsisiliupallattoqarnera kommunimut 135 million koruuninik naleqarsinnaavoq

Naalakkersuisut inatsiliupallannerat, sisamanngormat saqqummiunneqartoq sisamanngorpallu pingajussaaneerneqarlunilu akuersissutigineqassappat, 135 million koruunit angullugit annaasaqarfiunissaa, Kommuneqarfik Sermersuumit ilimagineqarpoq.

Kommuneqarfik Sermersooq aningaasaqarnermut naalakkersuisoqarfiup tusarniaassutaannut akissuteqaammini, inatsisiliupallanneq akuersissutigineqaraluarpat, kommunimi akileraarutitigut isertitassaraluit annaasinnaasani misissorsimavai.

Naatsorsuineq

Inatsissatut siunnersuutip nalunaarusiaani mittarfiliortitsinermi avataaneersunit isertitat tamakkerlutik nunap karsianut tutsinneqartalernissaannik imaqarpoq, aammalu avataaniik usuliartortut akileraarutitigut, isertitaat ilanngaasersungaanngitsumik 35 procentiinnarmik akileraarusersorneqarniarlutik.

Nuummi mittarfiliortoqarnissaa 1,3 milliard koruunit missaanni akeqassasoq, kommuneqarfiit pingaasaasa naatsorsuutimini tunngavilersimavaa.

- Sanaartortitsinermi aningaasartuutit 40 procentiisa missaat aningaasarsianut aningaasartuutigineqassasut ilimagineqakkajuttarpoq. Tassa 520 million koruunit missiliussavaat. Taakkuali maleruaqqusat atuuttut malillugit Kommuneqarfik Sermersuumi 42 procentimik akileraaruserneqaraluarpata, katillugit 218 million koruunit iluanaarutigineqassangaluarput. Taakkunannga kommunip tigusassai 135 million koruuniupput (26%), Namminersorlutik Oqartussat 52 million koruunit (10%) tunniunneqassaput, kommunillu akileraarut 31 million koruuniussangaluarluni (6%), tusarniaanermut akissuteqaammi, Sermitsiaq.AG-p allagaatinik takunnissinnaatitaanermik akuersissuteqarfigisaani, aningaasaqarnermut pisortaq Troel Tolstrup Pedersen allappoq.

Aamma atuaruk: Kommune mittarfimmik piginneqataarusuttoq

- Inatsissatut siunnersuut malillugu isertitat 35 procentimik akileraaruserneqarnerisigut, Namminersorlutik Oqartussat 182 million koruunit angullugit iluanaaruteqarfigissavaa, akissuteqaammi allassimavoq, tassa Namminersorlutik Oqartussat avataanniik aningaasaliisartunut mittarfiliornermi ataasiinnarmi avataaneersuut kisiisa sulisorineqaraluarpata, 36 million koruuninik akileraarutitigut oqilisaavigissavaat.

Akileraarutitigut oqilisaassineq 100 million koruunit pallillugit

Mittarfiliortitsinissanullu avataanersut qanoq amerlassuseqarnissaat ilisimaneqanngimmat naatsorsuinerit amigaateqarsinnaaneri eqqaaneqarpoq. Taamaammat kitsit ajornerpaamik pisoqarnissaanut tunngaviupput aningaasaliisartunulli 100 million koruunit pallillugit akileraarutitigut oqilisaassinerit mittarfiliortitsinissat pingasut tunngaviuppiut.

Powered by Labrador CMS