mittarfiit
Inatsisiliupallanneq kommuninit uggorineqarpoq
Inatsit, mittarfiliortoqarnerani akileraarutitigut isertitat nunap karsianut qulakkeerinnittussaq, kommunit uggoraat.
Sapaatip-akunnerata siuliani inatsisissaq saqqummiunneqarpoq, ullumukkillu siullermeerneqassalluni. Avataaniit suliartortut isertitaasa 35 procentiinnarmik akileraarlutik akileraaruteqannginnerussasut, akileraarutitigullu isertitarineqartut tamarmik nunap karsianut tutsinneqassasut, inatsissatut siunnersuummi allassimavoq,
Suliniut milliardilikkuutaanik naleqartoq
Akileraarutitigut isertitat naliginnaasumik kommuninut tunniunneqartaraluarput, Uanili taamaattoqasanngilaq, tunngavilersuutigineqarporlu, avataaniit mittarfilioriartortussat, paaqqinnittarfinnut atuarfeqarfinnullu kommuninit akilerneqartartoq, nanertuutaasussaanngimmata. Aningaasallu suliniummut milliardilikkuutaanik naleqartumut atorneqassapput.
- Uggoreqaara tusarniaassutigineqarsimanngitsumilluunniit inatsissatut siunnersuummik saqqummiussisoqarnera, kommunit kattuffiani KANUKOKA-mi siulittaasoq Simon Simonsen oqarpoq.
- Missingersuusiornerit ingerlanneqaleruttorput, kommunillu ilaat suliartortussanit taakkununnga akileraarutitigut isertitarineqartussaangaluit immaqa ilanngussimassangaluarpaat, Simon Simonsen oqarpoq.
Nunaqavissut atorneqarlik
Taanna isumaqarpoq, ilinniagaqarsimanngitsut kommunini pingasuni suliffissaaleqisut atorneqarnissaat pingaaruteqarluinnartuusoq.
Avannaata Kommuniani borgmesterinngortussaq Palle Jerimiassen, Naalakkersuisut kommuninut tusarniaassuteqaqqaaratillu inatsissatut siunnersuummik saqqummiussaqarnerat tupaallaatigaa.
Inatsisissasut siunnersuut ullumi siullermeerneqassaaq, inatsissatullu siunnersuut sisamanngorpat akuersissutigineqarnissaa pilersaarutaavoq.