innarluutillit illersuisuat
Inatsisileritooq inunnut innarluutilinnut illersuisunngorpoq
Nunatta inunnut inarluutilinnut illersuisua siulleq toqqarneqaqqammerpoq.
Inatsisileritooq Christina Johnsen, ukiuni ukiuni pingasuni atorfinitsinneqarpoq, taassumalu innarluutillit pisinnaatitaaffii qulakkeerlugillu ukkatarissavai. Taanna Sisimiuni inissisimassaaq.
Eqqartuussisoq aamma illersuisoq
Eqqartuussisoqarfimmi misilittagaqarluarnermik tunuliaquteqarpoq, tassani eqqartuussisuullunilu illersuisuunikuuvoq.
- Christina Johnsenip inunnut innarluutilinnut illersuisutut inuit innarluutillit taakkulu ilaqutaasa pisinnaatitaaffii soqutigisaallu siuarsarlugit sulissutigissavai - kiisalu inuit innarluutillit naammagittaalliuuteqarniaraangata siunnersorlugillu ilitsersortassavai aamma suliani pineqartunut attuumassuteqartuni tusarneqartarnissaat qulakkiissavaa, Naalakkersuisut tusagassiuutinut nalunaarummi allapput.
Inuit Innarluutillit illersuisuat naalakkersuinikkut arlaannaannulluunniit pituttorsimanngilaq pissutsillu illersuisup suliaqarfiinut attuumassuteqartut pillugit killilersorneqarnani oqaaseqarsinnaalluni.
Olsvig nuannaartoq
- Nuannaarutigeqaara inunnut innarluutilinnut illersuisussamik maanna toqqaasoqarmat. Toqqaaneq inuit innarluutillit atugaasa pitsaanerulersinneqarnissaannik pisinnaatitaaffiisalu eqqortinneqarnissaannik neriuuteqalersitsivoq. Qilanaaraara inuit innarluutillit illersuisuata suliaanut malinnaanissara. Naalakkersuisuni nuannaarutigaarput inuit innarluutillit atugaasa ukiuni makkunani immikkut ukkatarineqarnerat. Inuiaqatigiinni ataatsimoorluta suliaqarfimmi tassanerpiaq naligiimmik pinninnerulernissaq qulakkiissavarput, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig oqarpoq.